今年暑假超多好玩事！位置九龍灣展貿的Sanrio Game Master 8月6日開幕啦！ 這天我帶皮皮去左玩一大餐！超級多影相位～皮皮而家勁中意影相，擺post超強！而媽媽我這個攝影狂魔就更開心可以瘋狂影相！Sanrio Game Master 成個場都超靚超可愛！小遊戲都好玩～ 不論是大人／小朋友來到一定超瘋狂！超開心架！！！ 今年Saniro的主題是「棋盤」，有7大遊戲可以比你一試身手，每次挑戰一個Game需要一張遊戲券，而成功贏遊戲可以獲得徽章一個，集齊四個可以獲得一個小寶藏，而且每次贏左都會有多個擲骰機會再贏徽章，即係儲得越多徽章就會得到更多禮物！仲有終極超巨型Kitty大扭蛋！大家要加油呀！！！ 今年最注目的，必定是這《梳乎蛋廚房》～ Gudetama 今年第一次參加Sanrio 盛事，呢隻hea 蛋上位真快，實在太打耳了！ 煮蛋game在限時20秒將2隻蛋反轉，隻鑊好重架！小朋友玩唔到，等媽媽黎啦！ 好開心這裡很多梳乎蛋公仔影，阿皮勁影相，笑容超燦爛！ 最搞笑梳乎蛋扒o係度，個pat pat又大又圓係人都忍唔住摸佢個PP，笑爆嘴！ 話時話Gudetama 好多個名，除左梳乎蛋外皮皮會叫佢做雞蛋君，另外有懶懶蛋、hea蛋、蛋黃哥⋯ 佢既超懶惰性格太搞笑了！人氣tag #假如讓我hea下去 絕對係今年創意hashtag 之冠！ 然後到《Twin Stars 夢幻棋園》～ 一道彩虹歡迎和小孖星你！好靚好夢幻啊！ 皮皮今日影足咁多隻Sanrio 角色，我都好想囉～但今年我變左揸機果個⋯ 勁大小孖星波子棋有得摸就冇得玩，原來痴實哂～（≧∇≦） 唔緊要，呢道有野玩！遊戲「星星過三關」玩法好簡單，4個波波比你掉中三連關就贏啦！但阿皮唔夠高乜都掉唔中Y(^_^)Y 轉個頭去左《Kuromi扭計迷城》 入到去玩定力遊戲，越玩越迷幻，燈光夠迷幻不特止，皮皮仲邊玩邊著警號燈，暈得一陣陣(~_~;) 《Melody積木城》～ 皮媽我好中意呢道，粉紅趣緻城堡是少女（or中女媽媽）都喜愛，好浪漫呀～^_−☆ 遊戲是在膠粒中尋出Melody積木，再砌返Melody個樣，但原來有少少難架，積木真是有點難找的。。。 《Patty & Jimmy運動遊樂場》是碌保齡大賽，姐姐話：「細佬你只可以碌個波波去保齡球樽，但唔好掉個波波去姐姐度呀！」～可以轉個頭已經飛左落街。。。在限時20秒勁碌波波，好好玩呀！ 可是冇乜人識P&J，皮媽我細細個都唔多識佢地，如果係Kerokerokeroppi 或者係大口仔就好啦！我好鬼old school 架！ 《Monkichi 彈珠天地》 一入到去感覺似Disco，入面有三部手動彈珠機，要將小彈珠送到終點站實在有點難，因為中間有好多陷阱洞洞。。。皮皮就好奸要用手掩住哂所有洞洞，咁就可以成功將彈珠碌到去Finish了！哈哈，你咁都得，皮皮真係好古惑架XD POST王開心到要瞓身影相！笑C禾啦！ 《XO電子世界》～ 皮媽我細個唔中意Hello Kitty，覺得Kitty好女仔、好乸型。。。但XO就勁有型！黑蚊蚊都唔知咩動物都好中意，儲左好多XO貼紙和精品～ 今日皮皮入左XO既遊戲機裡面，「哎呀！媽咪～救我出黎呀！」@@ XO同大家玩遊戲機！幫XO吹返個靚髮～ 打機應該搵皮爸來幫手才最好的。。。皮皮仲未識打機啊！ 玩哂7個Game，仲有好多影相位架！ 《布甸狗神奇畫廊》有好大好大支顏色筆比你抱住影，如果畫得就好啦！ 話時話布甸狗明明係今年香港Sanrio大賞既第一位，可是佢只係得一個角落影相咋。。。 《Tuxedo Sam模型店》 最近我地都有玩砌模型，皮皮問：「D Kitty模型可唔可以meet落黎架？」 這裡有超大盒模型公仔影相，Melody和小孖星個個都手持一隻豆腐人，我都想儲返隻啊！ 最勁係呢隻巨型Hello Kitty 豆腐機械人，高過一層樓！ 仲有呢隻肥嘟啫企鵝，佢坐在一角冇乜人見到佢架！你地黎玩記住來找找他啊！ 全個場地上是棋盤，皮皮就跟住D格仔跳跳跳！無錯，佢係一隻「棋」黎架！哈哈～仲叫我猜包剪揼鬥快行，行下行下周圍有小棋子，我遇到Keroppi和大口仔，仲有冇其他呢？ 喂！連幅牆都好靚架！乜都要影！唔怪得我影左成2－3百幅相啦！ 壓軸是《Hello Kitty 玩具屋》！一比一真人Kitty大屋我地都好想搬黎住呀！ 如果可以入Kitty車車裡面扮揸車都好玩了！ 入到Kitty大屋勁興奮！樓高兩層架！皮皮好似參觀示範單位咁，左轉右轉，我地仲玩伏呢呢，哈哈！ 廚房都可愛過人，如果有得在這裡開餐一定食得好開心啫～ Kitty客廳有呢間Kitty大屋既迷你版，呀～有花園露台，真係Dream House啊！ 周圍都好靚，可是Kitty梳化唔好坐，硬極極既～～～應該得Kitty先坐得舒服。。。 上到Kitty屋企2樓，可以從高處睇Sanrio Game Master 全場！個VIEW好好啊！幾時搬黎住？ 最後去到終極Hello Kitty大扭蛋機！扭蛋狂迷皮皮好想扭哂所有蛋呀！ 轉個頭有真扭蛋機。。。好彩全部空的，否則媽媽真係嘔蛋了！如果你地來玩就會Fill哂所有蛋，集齊一套Sanrio寶藏的好機會！ 皮皮話今日好開心！Sanrio Game Master超級好玩呀！！！ 玩完仲有紀念品店，好多Kitty精品好靚呀！ 我覺得最正係Sanrio 限量版大富翁，我真係好想買一盒黎玩架！ 臨出門口時大會攝影會幫你影返張靚相的，憑票可到Photoshop加＄80買張靚相，我中意個相架，真係靚到不得了！ 如果大家想要齊所有Sanrio寶藏，就要留意場內的poster或購買攻略手冊玩家套裝，仲有download 「Sanrio Game Master」手機App獲取電子金幣，增加扭蛋機會，贏得禮物和終極大獎呀！ [Sanrio Game Master] 日期: 2015年8月6日至2015年8月23日 開放時間: 11AM - 8PM 地點: 九龍灣國際展貿中心地下 官方網站: www.sanriogamemaster.com 手機應用程式: Sanrio Game Master (7月31日起可於 App Store及Google Play Store下載) Sanrio Hong Kong Facebook: www.facebook.com/sanriohongkong 關於daidai ＆ pipi： Daidai ＆ pipi 的快樂魔法 博客： Blogspot ． MyBB.com.hk星級Blogger ．ohmykids Beauty Exchange ． she.com ． elle ． WeShare ． ubeauty ． 88db instagram：daidaipipi http://instagram.com/daidaipipi/ 微博：http://weibo.com/daidaipipi email: yuijoan@gmail.com
