想起6月頭去嘅清邁旅行,剛剛出發個陣真係既緊張又期待。 因為去過嘅朋友話去足10日都未玩夠! 咦!有無咁犀利呀,聽得人地話去曼谷行街食嘢做spa就多,清邁就真係比較少聽..... 而且仲話清邁無巴士無火車無地鐵! 最多就係見到紅噹噹的「雙條車」,就好似共享uber咁,傾好價錢地點就上車,可能同一架車有3,4個唔同目的地嘅乘客,就我所見搭雙條車嘅多數都係遊客。如果順路就可以好快落車,唔順路嘅話,就可以當係市內遊吓車河咁,或者睇下其他遊客住咩靚酒店...... 而小妹就真係幾日旅程中去左好多唔同酒店門口...... 當初聽都驚驚地,因為小妹出外旅行都依賴慣地鐘的水牌、指示同埋出口架嘛!! 但搭多幾次就真係會愛上呢種交通工具! 因為真係好方便,價錢又便宜! -----車尾無門架,坐最邊就緊記要緊握扶手啦!----- 入返正題,今次旅行係訂咗HK Express嘅套票6日5夜,5晚3星酒店連稅行李,大概$2500一個人! 去程: UO 753 16:50 - 18:45 回程:UO 754 19:30 - 23:15 住宿: 位於古城區 The 99 Gallery Hotel (3星) 一到清邁大概夜晚7點到 ------價錢:約$70 港幣------ 係過關位置會有人賣電話卡,檔口有華人坐鎮,可以用普通話溝通 4G 任用,都好快,可能有人話鴨寮街仲平,但小妹去鴨寮街車費都唔平,而且呢到有專人安裝埋,用到先收錢,所以都可以考慮一下! 拎完行李出入境大堂,轉右會有人叫你搭七人車,收費根據人數及酒店位置而定 酒店近機場,十分鐘車程要400泰銖(約$100港幣) 但回程時見到,原來另一出口都有雙條車等客 係酒店出發至機場先100泰銖(約$25港幣) 兩個人 不過第一次嚟就唔緊要啦,而且當晚仲要落暴雨 而係車程途中,司機會會叫你包車去玩,但我地本身都有報一日團所以就敷衍地答佢XDXD -----The 99 Gallery Hotel ----- 99 Intrawarorot Rd Mueang Chiang Mai Chiang Mai Chang Wat Chiang Mai 如果鐘意安靜嘅人就都可以考慮住古城區,呢間酒店The 99 Gallery Hotel就正正位於古城區,近機場,除了週末市場外,通常入夜之後就會比較靜同無太多商店做生意而呢間酒店附近就係著名景點帕邢寺,行幾分鐘就有間7-11便利店,Sunday Market就係過兩個街口,非常方便,拎住一袋二袋戰利品返酒店都唔太遠! 此外,呢間酒店都應該算多人住同出名,成個旅程,搭雙條車個陣同司機講「99」,司機已經知邊間酒店,一定會車到去酒店門口落車。 另外,Central festival mall會有免費穿梭巴士途經酒店門口,詳情可向前台,或上網查詢 記憶中好似一小時一班酒店對面有一間按摩店,試過兩次都唔錯,乾淨衛生,手勢唔錯,態度好。 300泰銖 1.5小時,有多個項目選擇 -----睇佢門面細細,原來都有成3層----- -----酒店正門,到埗都已經夜晚8點半左右------ 今次訂左雙人間單人床,房間都大,乾淨 廁所就有小小舊 每日仲會送個小果盤,有香蕉、山竹同紅毛丹,你唔食就會一直係枱唔會換! 房間有wifi提供,但成日連連下就斷 不過因為數據卡都好快又無限任用,所以就無理會 插頭都有好幾個,要同時充相機、手機、wifi蛋等等都無問題 -----房內如果多一張書桌就更好,可以放便擺嘢----- -----酒店內有個小小游泳池,真係好細,適合小朋友嬉水多啲----- 酒店有包早餐,以呢個價錢嚟講都算唔錯,有生果、沙律、腸仔、煎蛋、麵包、粥、粟米片、甜品、果汁咖啡等等,味道不過不失,填到肚! -----溫馨提示:食早餐前最好噴下蚊怕水先----- 酒店都有電腦供住客用,大堂職員態度友善 點擊圖片放大 -----大堂位置亦有一日團報名處----- -----溫馨提示:大堂有個雪櫃有免費支裝水提供,每位住客每次可以拎一支----- 總體而言,The 99 Gallery Hotel性價比都算唔錯,簡單樸實,乾淨企理,地理位置方便,環境安靜。 轉角位有間The 99 Heritage Hotel ,應該係同一集團,但裝潢偏向華麗高級,為四星酒店。