話說年頭貪平買左香港去柬埔寨嘅機票，就咁就一個女仔展開左柬埔寨8日自由行。喺無足夠準備嘅情況下，其實我出發前一日有少少想縮沙，不過好彩都頂住頭皮去，去完之後一個字「正」！呢個地方，我肯定會再嚟！ 第一日朝早搭HK express去柬埔寨，之後先知原來呢條係新航線，以前係要喺其他地方轉機，而家有直航實在太方便！因為早機嘅關係，3個鐘頭嘅航程全程訓左，訓醒就落機！喺飛機上面望柬埔寨，見到一大片嘅稻田、人工湖同好多好多嘅棕糖樹 - 柬埔寨嘅國寶植物。望住呢個景色，個心不其然平靜落嚟。 但係唔夠5分鐘，個心又進入緊張嘅狀態，因為要入境啦！至於點解咁緊張呢，相信有做過少少research嘅都會知柬埔寨嘅貪污情況非常嚴重，特別喺入境，海關官員會同旅客講「one dollar」，如果你俾呢「one dollar」，就可以好快入到境；如果唔係，其實都無乜嘢（哈哈哈哈），佢地最多都玩下野、拖延下你、唔俾你咁快入境啫。題外話，點解會出現呢個情況其實都係歸根於好多旅客助張呢個風氣，喺當日我排隊入境，排我前面嘅內地夫婦就「懶醒」咁叫我夾張一蚊美金喺本護照度。結果排到我，我梗係無夾錢喺本護照度，小女子時間多的是，不過可能因為我天生臭面嘅關係，個海關無問我拎「one dollar」，就咁就順利入境啦！ 呢個係機場嘅入境大堂，右邊係辦落地簽證，搞掂完落地簽證就可以到左邊排隊入境。 不過如果真係好怕遇到呢個情況，其實綜合網上嘅意見，有以下幾個方法處理： 1) o拿o拿聲搞掂落地簽證，再o拿o拿聲入境，海關官員見到入境條隊咁長，就唔會搞你咁耐啦~ 2) 扮唔識英文同普通話，喺咁大大聲聲問「What? What?」，等佢唔好意思 3) 堅決「SAY NO」，佢可能會黑面同拖延你，但其實轉個頭都會放你走 一出機場，右手邊有好幾間電訊公司，我求其揀左Metfone unlimited 4G internet，因為我主要都係Whatsapp同google map，所以只要上到網就可以，$1美金一日任上，平過$80港幣一日嘅Wifi蛋多多聲。我用呢間喺細圈收得麻麻，反而喺大圈同女皇宮又收得幾好，市中心完全無問題，不過去旅行都係唔好成日望住部電話，所以喺吳哥窟收得好定差我都唔係好care，搵到路就得啦！ 之後我就出去搵Tuk Tuk去旅館啦，雖然傳聞一出機場就會見到好多Tuk Tuk，但唔知係我鬼掩眼定唔好彩，竟然一架Tuk Tuk都見唔到，等左一陣終於被我截到一架，$4去到我間旅館，車程大約15分鐘。 陽光普照，等唔到Tuk Tuk又有咩可怕wor~ 其實我未黎之前最擔心就係搭車，結果我發現大部分司機都識簡單的英文溝通，無論搭Tuk Tuk定電單車，都非常方便。 之後會再分享我喺柬埔寨的所見所聞 ：）
