睇到眼火爆！ 每次睇完上面段片，歪歪我都會好嬲。嬲係因為個所謂老師嘅態度。佢唔尊重自己嘅職業（學生覆述佢講過嘅嘢），亦唔尊重學生（佢基本上係無回應個學生）。成個過程自以為是，不見得會接受學生意見，係典型「老師=神」嘅毒瘤mindset。 今日再睇返，我比任何一次睇都更嬲。因為我終於見識到一間學校，過半數老師都當自己係神，然後埋怨學生質素。佢哋請病假時我都有代過老師口中所謂嘅好班同差班，結果係好班又好，差班又好，佢哋咪又係學生一班！而嗰間學校嘅老師當自己係神，唔係淨係學生嘅神，仲係所有低職位過自己嘅人嘅神。換句話，就係玻璃心。我係神，你唔十足十咁跟住我嘅諗法做，即使你提議合理，你都係罪人，係你問題！神係無錯嘅，一切都係你嘅錯！你有異見？咁你就係無得救㗎啦！ 我教過中學、小學、banding好、banding差。教學方法係需要調整，但係教學態度、去到邊都係一樣。學生喺任何時候challenge我，都唔會有罰則。相反，如果係學生有諗過先提出或者提出問題可以啓發到人嘅，仲會有獎勵添！教學本身就係要訓練學生獨立同批判思考。如果我覺得會影響課堂嘅，我會請佢哋係課餘時間搵我討論。萬一佢哋激動咗，或者語氣差咗，我會喺落堂之後單獨提佢，分析佢嘅表達方法會有咩弊處。即使係堂上會有好多好似係學生質疑我嘅對話，但「唔尊重」唔會係一個問題，因為首先我尊重我每一位學生，我尊重自己嘅工作，做好自己自然贏得學生尊重。
