有一日，係我走入個班房之際，有一學生「哎吔！」一聲，道：「Miss 槍，佢打我呀！」原來有一個學生係課室度玩遮。佢好開心咁㩒個制去令把遮自動伸縮，點知把遮點到另一位同學。係証實無任何人受傷後，我好本能咁問玩遮嗰位學生：「點解你要咁做呀？」我問完自己都呆咗一呆，然後自己答埋：「你知你就唔會做啦。」 我事後諗咗好耐，點解我會問啲咁無營養嘅問題，但都百思不得其解。直至呢排，我留多咗係屋企，我就知道啦。「點解你練完琴唔晾返好啲衫嘅？」，「點解我講咩你都要駁嘅？」，「點解你揾親啲工都去到咁遠嘅？」，「點解你揀親都係啲揾唔到食嘅科嘅？」......咁多點解，唔係一個人講晒，而呢種問問題方法，係親戚朋友都會用。然後我發現呢啲問題周圍都係，地鐵啦，學校啦，超級市場啦......機本上有廣東話同長輩嘅地方都聽得到。我去到好後期先發現，原來呢個唔係一條問題，係唔使答㗎！如果同學生咁講嘢，就算佢明都會唔順氣啦。 其實我哋可以直接表達嘅「練完琴要有手尾晾返好啲衫。」、「你搵啲近屋企啲嘅工，咪唔使咁辛苦囉。」、「你不如揾啲對你仕途有幫助嘅科嚟進收啦」。雖然就都唔係幾好聽㗎啦，但係好過問條答你唔到嘅問題吖！至少我知道我唔使答先吖嘛。係咪先？
