唔使再去旅行時搬啲好重又易打爛嘅蠟燭返香港喇！超超超期待嘅Bath & Body Works香港沙田店終於喺6月1日開幕。作為BBW香薰狂迷嘅我當然第一時間去朝下聖。 當日係假期下晝接近1點嘅時間，店外面已經開始要排隊，大約等咗5分鐘就入得喇！不過當我離開嘅時候見到條隊好似愈來愈長（圖中就係我離開時嘅人龍！） 一行入店就見到BBW最受歡迎嘅三芯蠟燭，好多香味，買兩個有優惠價錢都合理。一見到就忍唔住遂個打開試聞，有好出名、人稱「A&F香味」嘅Mahogany Teakwood（男人味），發現到有個香味叫Bergamot Waters超好聞的，甜甜哋好放鬆嘅佛手柑香，當然仲有我最愛嘅Rose Water Ivy玫瑰水香！ 之後就開始見到好多Body Lotion同Body Mist喇～呢2個應該係佢喺嘅Signature香味？我自己都有用過佢哋呢款Body Lotion，質哋輕薄水潤，好啱依家夏天用。 入面有更多嘅潤膚乳同身體噴霧～全部都有TESTER試味 經過疫情後，應該好多人都用過佢哋嘅酒精搓手液！$25一支，$68三支。現場好受歡迎，個搓手液架有啲細，要等一等要迫到埋去。雖然香味唔算好多但有TESTER試味。不過諗起屋企仲有4，5支未用，所以都係留返下次先再買。 仲有都係疫情必備嘅洗手液，買幾支送禮都幾實用。 行入去另一邊就見到一整個洗手液牆😍好多香味。 同外國一樣，店內都有個洗手盤嘅位可以試用洗手液、淋浴露等產品，不過當日現場所見係暫時無得用住。 我最愛嘅Aromatherapy系列！香薰治療呢個系列通常啲香味都令人好放鬆好舒服。如果要買佢哋嘅沐浴產品首推呢個系列！呢個系列嘅沐浴露用咗好多年都keep住回購。綠色嗰個Stress Relief係舒壓嘅尤加利薄荷香，係呢個系列最愛歡迎嘅香味，另外有款就係我自己最鍾意、都係Stress Relief嘅尤加利+茶香就未見有。 仲有Travel size嘅小角落。好似得Gingham紅白格呢個香味？呢個Gingham香味嘅前身係我超鍾意嘅藍白格香味，今年佢出咗紅白格呢個香味都係Signature，係小蒼蘭花香同埋有少少玫瑰花香，都幾討好幾清新。 繼續有我最愛嘅三芯蠟燭牆，都幾多香味，試聞咗好耐😍 不過我喺美國官網見到有幾款我好想試聞嘅香味原來香港都無，仲有好多今季最新款都唔見有😫 單支芯嘅中型蠟燭竟然得下面呢度眼見咁多，呢個位有點少失望。記得之前去過旺角一啲賣BBW香薰嘅IG SHOP實體店明明都有好多香味。 最後就有香薰噴霧同埋車用香薰。香薰噴霧噴出嚟香味超濃，細細支帶出去用好似都幾方便。 最後最後！仲有呢款小夜燈香薰&插座。呢款想試好耐了！之前喺外國BBW嘅插座&電壓唔啱香港用所以一直都未試到。只要插電、裝上香薰就會持續散發香味，啱晒屋企唔適合點火燒蠟燭嘅朋友。 決定要試下我啱啱一聞就心心眼嘅Bergamot waters😍 因為之後仲有下場，所以今日就暫時買住小夜燈香薰&插座先，費事攞住啲重野周圍走！（話說我一離開就聽到店內傳出響亮嘅爆玻璃聲，大家喺店內記住要小心行走，輕放產品）後記： 小夜燈香薰&插座..原來我㨂嗰款插座好似係無燈的🥲 之前網上見到啲有燈嘅款式勁靚..如果大家有興趣買又想有燈，建議可以問店員們確認一下！店員們都幾NICE㗎！ Bath & Body Works今次進駐香港將會開兩間分店，分別喺沙田同東涌。沙田分店已經開幕，東涌分店都應該即將開幕。到時一定要再去朝聖同埋要計劃入貨了（雖然屋企仲有好多Bath & Body Works蠟燭未用完😆）希望嚟緊東涌開幕會有更加多嘅香薰蠟燭選擇，最想要美國嘅最新款！另外Bath & Body Works香港都即將會有官方線上銷售平台，如果銷售平台可以提供更多選擇就好了。依家就暫時得天貓香港旗艦店線上有售（而我係唔會用）。總括！Bath & Body Works香港 : 必買產品推介三芯香薰蠟燭 $258@1，$428@2免洗潔手液 $25@1，$68@3洗手液 $85@1，$148@2Aromatherapy系列沐浴露 $158@1小夜燈香薰與插座 $138@2
