收工暴走吉隆坡1日之旅 (上) https://blog.ulifestyle.com.hk/blogger/crazy/2014/12/%E6%94%B6%E5%B7%A5%E6%9A%B4%E8%B5%B0%E5%90%89%E9%9A%86%E5%9D%A1%E3%80%81%E6%96%B0%E5%8A%A0%E5%9D%A12%E6%97%A5%E4%B9%8B%E6%97%85-%E4%B8%8A/ ...話說今年8月咁岩有朋友去吉隆坡工幹1個月，可以屈蛇癡佢住5星酒店，慳到晚酒店錢之餘，我又未去過吉隆坡，都想感受下馬拉風情，草下d護照chop印，所以就決定去2日2夜探下佢。上到AirAsia睇機票既時候，突然醒起其實新加坡都好近喎，貪心既我就突然將2日2夜吉隆坡行程轉左做得返1日，撥左1日比新加坡...... 夜晚係吉隆坡玩完，返到酒店沖埋涼訓既時候已經4點半，由於我5點半要起身搭6點半班機場巴士趕8點45分既飛機去新加坡。換句話說..我得1個鐘訓….lol 訓得一個鐘頭又要起身，梳洗完後，當我搵風筒時，我發現廁所入面係無插頭架！真係情天霹靂...而我又太好心唔忍心嘈醒哂房入面既2位朋友，我就膽粗粗拎住個風筒落左去fitness room搵左是旦一個插頭借電用啦，當時係清晨5點幾天都未光，人影都無...不過好彩咩事都無...哈...哈... 一個人拖住個行李，又沿住本來黎既路行返去Puduraya巴士站度搭機場巴士。由於吉隆坡機場分左2個KLIA，但落車個陣由於太早既關係失憶唔記得左究竟係KLIA定係KLIA 2...我最後揀左KLIA...又死好彩，無事喎。 上到機訓到好似死豬，話咁快就10點鐘落機。即刻走去過關先，點知見到呢張野： 嗯...雖質我光明正大，無做犯法野，但係我不得不承認我係有d怯...哈哈。 過關都用左我成粒鐘，個海關睇我本護照都睇左一陣，可能因為事隔只不過係一日既時間就由香港去吉隆坡再過新加坡，覺得我有d可疑啩...哈哈。入左新加坡第一件事就去左寄存行李先，因為我向新加坡只係一日咁大把，夜晚要趕尾班地鐵去機場飛返香港，所以擺向機場就最方便啦。當我比大額既坡紙比寄存行李個大叔既時候，佢問我有無散紙，我答無，佢就燶口燶面，睥住我，當下有點兒難受...嗚嗚... 寄完行李就去左買地鐵飛，我無特登去買EZ-Link card / Tourist pass，因為粗略估計條隊都要排成個鐘...唔太明智，唔明點解可以去市區買唔使排咁耐，又唔係蝕好多，d人都係繼續排到天荒地老，所以我都係決定之後先再買。新加坡既地鐵係貫通機場同市區，真係好方便呀，又平...佢地既地鐵飛都幾得意，係用紙造既，一搣就會爛... 我第一站決定去武吉士 Bugis站既「雅柏熟食中心 Albert centre」，貪佢由機場去可以直接到，又係一個好熱鬧既地方。出左地鐵站就靠先前download左既Google offline map搵路，點知佢反應非常慢，點錯我行錯路。搵黎搵去都搵唔到雅柏熟食中心，點知反而誤打誤撞去左「哈芝巷」，見到5顏6色好得意就入左去，呢度類似一個創意市集，有好多另類既小玩意，唔似一般商業區咁悶。咁岩個日有shooting... 雖然新加坡向地圖係好細，但係向地圖入面既路就要行一段時間...行行下，原來已經點半鐘...我連早餐都未食過，愈諗就愈肚餓...見到個類似女人街既巷仔，諗住睇下入面有咩食，行完就見到大大隻字寫住「Albert Centre」啦...雙手合十感恩！ 新加坡第一餐就奉獻左比「東風發 」，d雞真係好好食呀，真係滑到不得了，一d都唔誇張，呢個雞飯既精髓係個汁，真係一絕！唔好話我當時餓到食咩野都會話好食，其實我覺得佢個飯唔好食架，有d乾身，但佢個雞係香港就真係食唔到咁正啦。 除左大部分既熟食中心都有東風發之外，聽聞總店個間更好味。 地址: 01-49 Ghim Moh Market and Food Center, 20 Ghim Moh Road 下一站就係去新加坡既唐人街－牛車水。 點擊圖片放大 呢個咁中式既建築，係「佛牙寺」。 沿著佛牙寺向前行，由於個期咁岩係盂蘭勝會，新加坡既華人都會有傳統既習俗儀式。 再行前小小就係麥士威熟食中心啦，我食左個好出名既老伴豆花。佢既口感唔係我地平時向香港食既個種咁滑同虛無縹緲，而係好實在，口感有d似豬紅既質感，好好食。 之後我就去克拉碼頭，當然就係搵松發肉骨茶食啦，點知我係不遠處發現左亞坤，回想起朋友話佢係新加坡食左幾次神級好味既亞坤咖椰多士，推薦話係必食既。我點左個牛油咖椰多士，試完之後真係好難忘呀，成塊多士可以用「鬆化」黎形容，係香港都係食唔到。就算前排比左2次機會比香港既亞坤，都係食唔返新加坡個隻味道同口感，所以為左唔好影響對咖椰多士既印象，大家都係去新加坡個陣先再食啦。 松發肉骨茶係黎到新加坡必食既食物之一，時時都大掛長龍，而我當日只係排左15分鐘左右，都算好快有得食。新加坡既肉骨茶湯底係胡椒味，所以我都係鐘意馬來西亞既藥材味肉骨茶多d，我硬係覺得胡椒味肉骨茶自己係香港唔難整，但想整一煲好好味既藥材湯底肉骨茶就好難，因為味道好難可以調較得岩岩好同恰到好處。 食完松發，又係時候行下d地標消耗下d卡路里啦。話都無咁快，前面就見到濱海灣金沙酒店，好似成隻船頂左上天咁，望上去都覺得非常瑰麗堂皇。而濱海藝術中心就成個榴槤咁，都幾搞笑同得意架。 點擊圖片放大 再行前小小，見到一大堆人駐足望緊d野，我就知我黎到細細個已經成日聽人講代表新加坡既「魚尾獅」啦。無諗過會咁細架，就好似去左法國羅浮宮見到蒙娜麗莎一樣。哈哈哈。 影完地標相交功課之後，沿住個海濱繼續行，我見到之前去泰國食完都好回味既Magnum cafe，不過由於我飽得濟，我最後都係放棄左。。。呢間Magnum cafe除左賣雪糕出名之外，佢最特別既地方係有融合朱古力整既菜式。e.g. 朱古力意大利粉 ;P 行左2日，真係有d攰，又唔太夠訓，只好坐低休息下。新加坡海濱都幾好，有好多地方可以坐。 (係！無錯，我朝早出左新加坡機場之後就係著住呢對拖鞋啦！哈哈！所以對腳真係好攰...) 其實我坐低既原因除左因為太攰之外，仲係因為我等緊8點鐘既lighting show。大家都一行一行咁坐係金莎酒店既前方，等待8點鐘既來臨。開始啦，佢地既lighting show係3D架！ZzzZzz...我真係好眼訓，恰下恰下，不過我都要讚下呢個show確實好精彩。 夜晚8點幾，襯仲有d時間，就去24 時營業既老巴剎食埋最後的晚餐啦。入面既餐廳多不勝數，售賣地道既炒粿條、串燒、胡椒蟹，應有盡有。我都係本住我咁多年去旅行既經驗，愈多人排就跟住排就實岩既心態。叫左個喇唦米粉食，又係好味到不得了，唔知係賣哂定係正宗既煮法，我碗喇唦入面無蝦，有小小失望，不過都係咁好食。 去到機場，係最後衝刺既時間，我買左向新加坡好出名既班蘭蛋糕做手信，順便我試埋佢鋪頭甜點，幾好食架。佢地好鐘意用椰汁做甜點，嘻嘻。當然，我唔可以錯過呢間開24小時既亞坤咖椰多士啦。(又話老巴剎係最後一餐 XD) 踏入新加坡機場禁區，我知道又係時間講拜拜啦，回想起呢2日做左咁多野，自己都有小小唔太相信既感覺，雖然時間真係好短，不過整個旅程都非常充實，我已經好滿足啦。估唔到自己仲好青春，雖然唔係十幾歲，但我仍然捉得住青春的尾巴架。 坐住廉航Scoot返黎香港，佢地除左唔派餐之外，真係一d都唔會有廉航既感覺，我要大讚佢地空姐確實非常親切，笑容滿臉，有種service from heart既感覺，當時係零晨1點幾2點，都咁energetic，真係好犀利。機上坐位既空間好闊落，可能係因為用新航舊機，所以好舒服！而且佢地仲要播放住一d pop music (當時播住The edge of glory - Lady Gaga)，就算臨近旅程既尾聲，我就要返香港，都令我心情好開心呀！ 送上一張機鐵途中日出照！好美好既一日，我又懷著大好心情趕去返工啦。
