之前幾篇都有分享過我地唔再用PTFE易潔鑊既原因，今篇又分享下我地依家用緊咩鍋，係咪取代到PTFE易潔鑊。 首先就係琺瑯鑄鐵平底鍋，都係好好用的。琺瑯塗層係用玻璃細粒燒製而成，化學成份同沙石一樣，但不沾性能唔係最高，一般唔用腦煮簡單野我地都會用易潔鑊。 第2係鑄鐵牛扒鍋，非常厚身非常重，傳熱慢但儲熱力高，煮牛扒岩晒，不過好明顯佢只有特定用途。 第3係熟鐵鑊，有左佢，用家用爐都煮得出少少鑊氣，整乾炒牛河特別好食。不過缺點都唔少，例如次次用完要用油養鍋，同埋用耐左會積落好多鑊屎，會整到d食物黑媽媽，家用爐又唔夠中餐廳既火水爐高溫，唔可以直接燒走鑊屎，所以都係難搞。講不沾性能出色，易於打理，又無安全疑慮，暫時見到市面上既選擇基本上只有陶瓷不沾鍋。陶瓷塗層既原料係黏土/沙，被製成溶膏狀後，會被噴灑上鍋身，經高溫烘焗，形成堅固同滑溜不沾既塗層。由於佢化學組成成份係矽同氧，同沙、石、玻璃一樣，所以被認為係健康既選擇，而相比起PTFE鍋260°C就會受破壞而且釋放有毒氣體，陶瓷不沾鍋可以抵受450-500°C既高溫，而且就算去到高溫度，都只會損害不沾性能，唔會好似PTFE鍋咁釋放有毒既PFAS氣體。咁陶瓷不沾鍋係咪完美既鍋？又唔係，因為陶瓷塗層相對黎講係無咁不沾，尤其係用得高溫多，不沾性能會慢慢下降，所以唔同廠商都係建議使用時避免長時間使用大火。但又咁講，即使PTFE鍋都係消耗品，因為無論PTFE定係陶瓷塗層，都會自然係煮食過程中被刮花，所以使用有塗層既鍋都應該配用矽膠鑊剷，用海綿或布清洗，同埋避免煮有骨既菜式，去減少損耗。易潔鑊安全選購及使用整合完整文章_____________________________________________________Facebook: 小夫妻OvercookedIG: couple_overcookedwebsite: www.coupleovercooked.com
