我地兩公婆讀大學既時候，除左鍾意去泰源食雞粥，仲好鍾意去禾輋冬菇亭陳根記食晚飯（例牌會叫Wasabi手撕雞），無論係兩個人拍拖定係成班人熱熱鬧鬧食飯，大排檔都係百吃不厭既選擇，話陳根記充滿開心既回憶，絕對唔係誇張既講法。隨住我地畢業，又同往時朋友少左見，我地都少左去陳根記食飯，然後最近有機會重遊故地，昔日既冬菇亭原來已變成室內食店了。香港人最近都見慣舊事物被拆毀，新事物又以驚人既速度建立起黎，轉變太快，適應不能，不妨從自己既回憶中搵返據點，重新得力。我地今次就整左陳根記名物Wasabi蟹籽手撕雞，可以一路食一路懷勉美好回憶，絕對係我地既comfort food。Wasabi芥辣蟹籽手撕雞 記得初初係陳根記食Wasabi蟹籽手撕雞係有種驚喜既感覺，無諗過雞、wasabi、海蜇、蟹籽咁樣溝埋會咁好食，然後佢就變成我地每次都會叫既例牌菜，如果咁岩個晚去到賣晒，會覺得好失落haha我地依個版本未調校到陳根記個種風味，叫做係咁意做到大概感覺俾自己懷勉下啦！ N年前攝於陳根記既元祖Wasabi蟹籽手撕雞 材料有雞脾兩隻、火腿兩片、蟹籽、海蜇、蛋黃醬、Wasabi(食壽司外賣儲落的lol) 由於盒裝蟹籽份量太多，又貴，所以我地去爭鮮買左3舊蟹籽軍艦，盛惠＄9，仲有wasabi送lolllll 用少少鹽同胡椒粉醃一醃雞，半個鐘左右 蒸熟雞脾，我地用蒸爐大概蒸左30分鐘 火腿切條 我地切左一部份雞出黎另外蒸熟 然後整左手撕雞俾兩隻野食，佢地食得超開心(睇下墨硯條尾)，應該好味過平時d罐罐好多 蒸好雞，放入冰水浸浸佢，令佢口感更爽彈 可以手撕雞喇 用蛋黃醬、wasabi同雞粉調醬汁，調至自己鍾意既味道 準備好所有材料 撈撈撈撈撈，完成！ 配埋個家常湯同窩蛋(意外爆左)牛肉煲仔飯，非常滿足既一餐！中英文詳細食譜Facebook: 小夫妻OvercookedIG: couple_overcookedWebsite: www.coupleovercooked.com
