相信香港人都一定有食過譚仔名物土匪雞翼，個種香氣遠遠已經令人認得佢，我地既譚齡(食譚仔既年資)大大話話都超過10年，當年拍拖無乜錢，諗唔到食乜好自然既選擇就係去譚仔食，而間中想食得豪d就會叫碟細土匪(當年真係超窮)，每次食完都會好滿足。時至今日，一星期仍然點都會食一次譚仔，而土匪雞翼依然係食極唔厭。 你食開既係大土匪定細土匪？我地今次既係氣炸鍋整既XXL土匪！ 氣炸土匪雞翼 氣炸版本既土匪雞翼依然係香氣四溢，我地覺得更正既係個皮更酥脆，而入面係多汁到一咬就爆出黎 材料有雞翼約10隻，生抽、雞粉、黑芝麻、五香粉、孜然粉 雞翼浸水解凍 解凍後抹返乾佢 調醃料，生抽3茶匙、雞粉1茶匙、五香粉2茶匙、孜然粉2茶匙，撈勻，試味 由於粉多過水，撈完出黎既醃料非常稠 醃雞翼 由於第一次整，拎住2隻黎實驗下先。醃左一個鐘，氣炸前再撒孜然粉同黑芝麻 開180度12分鐘煮熟佢，然後200度3分鐘炸脆個皮 我地用依個氣炸鍋既好處係可以一路透過視窗睇住佢煮既過程，而佢既設計係食物上下都吹到熱風，唔洗煮煮下又要拎出黎翻翻佢咁麻煩 實驗品出爐了，非常香，雞翼入面又嫩滑多汁，氣炸時間控制得好，不過反而係最後撒得太多孜然粉，同埋醃一個鐘未夠入味 有左實驗品既經驗，今次醃多個幾鐘先再氣炸 9隻岩岩好放滿一層，個氣炸鍋最多可以放三個層網，要整10人Party份量都夠做 外脆內嫩超級香，好好食！依度一隻面向上一隻底向上，無翻到都炸得均勻 中英文詳細食譜 _____________________________________________________ Website: www.coupleovercooked.com Facebook: 小夫妻Overcooked IG: couple_overcooked
