我地之前都介紹過係屋企整乾炒牛河既方法，不過個次就係用熟鐵鑊同埋炒勺去整，唔係個個屋企都有ed廚具，所以今次就試下用新入手既鑄鐵平底鍋去炒，仲可以連鍋咁上碟，延長保溫時間，一路都食到暖笠笠既牛河！依篇都會講講琺瑯平底鍋既清洗方法。鑄鐵鍋乾炒牛河 乾炒牛河連鐵鍋上碟，牛河更保溫，賣相亦更靚 乾炒牛河材料：炒河1斤(唔好洗啊)、牛柳份量隨意(用生抽、老抽、蠔油、麻油、紹油、生粉醃10分鐘)、洋蔥半個、芽菜、韮黃、薑米、蔥花醬汁就係用左生抽、老抽、蠔油、味醂、紹酒同水混和而成，溝完試下係咪岩味 中大火燒熱鍋，加油，再放牛柳略略炒香，拎返起 撈起牛柳後加洋蔥同薑米炒香，全程用中大火 加河粉煎香。說明書教炒易黏既食物時最好轉細火，咁先可以避免痴線，不過我地都無理咁多，照中大火落河粉，預左佢會痴，但想試下佢既傳熱力係咪真係咁勁，可以令乾炒牛河表面產生梅納效應既香甜感 加芽菜 落醬汁，可以分開幾時落 牛柳回鑊 熄火前，加韮黃。韮黃係食佢半生熟個種香甜，所以最後先落。炒返勻佢就完成乾炒牛河喇！ 食前灑上蔥花。依個平底鍋既傳熱能力強，就咁燒熱個鍋30秒，加一匙水落去可以見到佢即刻蒸發晒(詳見我地開箱文)，依個特性可以快速令食材表面變得乾脆，可以炒得出好好味既乾炒牛河！琺瑯平底鍋清洗法 由於琺瑯質地既不黏沾特性唔及易潔鑊，個鍋預熱不足就會有痴底情況。痴到咁會唔會好難搞？ 今次依個例子正好可以同大家分享埋依點 將滾水倒入鍋，由佢浸一陣 煲左熱水，順便就手沖個咖啡，今次係香港Knockbox炒既肯亞豆，有黑加倫子同木瓜風味 手沖咖啡最佳品味時間係一沖起個下開始，稍為暖左會飲到唔同既風味，而攤涼左就多數會酸，飲得多手沖咖啡，大概都會領略到咩叫活在當下 飲完咖啡可以返返去洗鍋。有得塗層既鍋都唔應該用硬物刮佢，所以一般都係用防刮百潔布，痴住既河粉好容易就可以除去 如果仲有頑固污漬，落d梳打粉，加熱水，開細火煲一陣，再重覆用防刮百潔布清潔，就可以清理晒所有污跡了 靚返晒中英文詳細食譜Website: www.coupleovercooked.comFacebook: 小夫妻OvercookedIG: couple_overcooked
