無水蒸係乜野？無水蒸同傳統隔水蒸有咩分別？無水蒸好處係咩？有咩無水蒸菜式推介？ 今篇小夫妻一次過解答依d問題！咩係無水蒸?無水又點蒸？無水蒸依個詞係相對於普通蒸法，普通既蒸法會有外來水份(例如隔水蒸就係食物下方既滾水，蒸氣爐就係爐中既水蒸氣)所揮發出既水蒸氣將食物蒸熟，而無水蒸就無左外來水份，直接利用食物本身水份揮發出既水蒸氣將佢蒸熟。所以「無水」係講緊無外來水份，「蒸」就因為食物都係靠水蒸氣蒸熟。有法國朋友就同小夫妻分享過無水蒸既命名本身源自法國一種名為「à l’étouffée」既煮食技法，直釋係「窒息咁煮」，通常就係係煮蔬菜類既食物時，唔加水同只加好少油，蓋好鍋蓋然後開好細火，用食物本身揮發出黎既蒸氣去將食物蒸熟。 隔水蒸大家都試過，佢係用食物下方既滾水所揮發既水蒸氣而煮熟食物 無水蒸就係將食物直接放上煲，再將煲放上爐面燒，用食物本身既水份所揮發出黎既水蒸氣熱力將佢本身煮熟無水蒸有咩好處?同隔水蒸一樣，因為唔洗落油，所以咁煮野食會健康D，依樣咁基本就唔多講了。我地覺得最正既係無水蒸出黎既食物因為可以保留更多食物既水份，食起上黎質感會更飽滿，亦會更鮮味。我地第一次食無水蒸腐乳雞翼時個種香濃又juicy既味道，真係令人相當難忘! 無水蒸雞翼係將雞翼醃好後就直接放落煲拎去煮，製成品係一咬落去有好多肉汁，而味道亦好香濃，一試難忘!無水蒸要點整?如果打邊爐最緊要係個爐，咁無水蒸最緊要就係個煲。唔係所有煲都可以用黎做無水蒸，佢要符合以下幾個條件:唔易痴底 – 由於食物直接放上煲，痴底既話成煲食物可以報銷保溫能力強 – 用無水蒸既方法，開火時間一般都係幾分鐘既事，之後就要熄火焗佢，保溫力弱既話食物就會煮唔熟鎖水能力強 – 如果個煲好易令蒸氣散失，唔單止會唔夠熱力煮熟食物，食物仲會越煮越乾，失去無水蒸意義而無水蒸既過程一般都係分為以下3個過程開中火 – 令煲內溫度短時間提升到足夠煮熟食物既程度轉細火 – 保持住適當又穩定既高溫烹調食物熄火焗 – 用餘熱將食物徹底煮熟之餘，又可減少食物受爐熱既時間，保留更多食物水份同令佢食上口更腍滑整無水蒸菜式最難係要專登買個岩用既鑄鐵鍋，其他過程都係好簡單。而無水蒸可以應用落海鮮、雞、豬等等各種食材都得，今篇就會同大家介紹小夫妻之前整過既無水蒸菜式。有關無水蒸的常見問題無水又點蒸，散播偽科學？建議睇完標題就落結論既朋友，可以先重新睇睇樓上內容，謝謝。明明係炆/ 慢煮/ 烤，做咩要叫無水蒸？係有唔同既。如果簡單咁講，炆/ 慢煮/ 烤所需既時間一般受熱時間都比較長，無水蒸就一般開火10分鐘內完成。而煮出黎既效果都好唔一樣，無水蒸最接近蒸，同其他方法煮出黎既食物好唔同。如果有興趣知道詳細版分別，可以睇睇樓下有關無水蒸原理既介紹。就咁燒個煲咪會燶囉？無水蒸開爐既時間多數都係10分鐘內，火未黎得切燒乾食物，已經熄左火，所以唔會有足夠時間燒燶個煲。我求其用個煲黎無水蒸有咩問題？做無水蒸菜式一個主要原因係想令食物質感更腍，同埋保留更多肉汁。如果用既煲無高鎖熱同鎖水特性，就唔會做得到無水蒸既效果。無水蒸係咪即係等如放個煲入焗爐焗？放入焗爐就更加係另一件事，開焗爐係用穩定高溫將食物煮至徹底熟透，而烤焗好多時係追求香脆乾身效果，同無水蒸完全唔同。有關背後原理請睇埋下一段。但當然，你可以純粹係將蓋好既鑄鐵鍋放入焗爐，焗到佢剛剛好有水蒸氣蒸發，再拎返個鍋出黎等水蒸氣蒸熟食物。不過要咁做既話，點解唔直接用爐頭黎燒佢幾分鐘？無水蒸既原理係咩？閣下肯睇篇文睇到依度，小夫妻都想俾個認真d既答案你，我地整合左d資料，嘗試用科學角度探討無水蒸點樣煮熟食物，又點解咁煮會好食左，亦詳細d講解佢同其他煮食技法既不同。係無水蒸既過程中，開爐燒煲個幾分鐘其實就係將最接近煲底既醬料同肉汁加熱至沸點，令佢地變成水蒸氣。另一方面，較遠離爐火既肉有較低既溫度，兩者既溫度差異產生出熱力對流，而水蒸氣就係咁將食物加熱。由於食物都係透過蒸氣加熱煮熟，所以味道會最接近蒸出黎既食物，依度亦解釋左無水蒸同炆、焗、慢煮、烤等等煮食技法既不同。咁既然都係用水蒸氣，無水蒸同普通蒸原理上有咩唔同？分別就在於熄左火之後既時間，無水蒸既食物係短時間內無左加熱來源，但就透過鑄鐵鍋高鎖熱既特性，將水蒸氣鎖係鍋內繼續煮熟食物，相比傳統蒸法，無水蒸係依個階段既煮食溫度相對較低，亦因此肉類蛋白質既凝固程度較低，食上黎就自然比較腍，加上鑄鐵鍋鎖水力強既特性，食物所保留既肉汁亦相對較多。因為背後獨特既煮食原理，將無水蒸同其他煮食技法分開命名有佢既合理性，不過如果你都係鍾意叫依種方法做其他名，甚至話佢係「煮」，其實都係各有喜好，反正跟住依個方法去蒸食物真係比較好食先係重點。中英文詳細食譜website: www.coupleovercooked.comFacebook: 小夫妻OvercookedIG: couple_overcooked
