買左飛睇畢加索展, 對於我住港島既人黎講，去到沙田咁遠，唔食埋餐飯真係嘥左個食好嘢既機會。 咁啱響文化博物館入口側有間食燒烤/串燒既新店，裝修簡約清新，所以睇完展覽就響呢度食。 今次 仲試埋openrice 既tablemap 服務，雖然個侍應唔係好熟個系統，我都係試到成功訂位呀。 餐廳裝修以紅色為主色，襯白枱，雖然同 文化博物館既古色古香唔襯，但我覺得反而有自成一格既感覺，可以吸引客人！另外餐廳特別既地方係佈置用咸蛋超人！ 餐廳主打食串燒，侍應推介$188既鹽燒西冷，有350g ，要了一份，另外有串燒必吃既牛脷、雞腎、雞軟骨，特別小小既係煙肉年糕，另外叫左白汁海鮮焗飯、金菇炒天使意同白酒花甲。 一上枱係白酒花甲，好有驚喜，因為以為花甲會係大隻，但上上枱見D蛤係好細隻，份量又好少，隻碗真係得普通飯碗長少少咁大乍，味道呢…蛤肉係唔多新鮮，有DD霉既感覺，唔甜，個白酒湯底仲奇怪，飲落第一個味道係覺得飲緊水（即係好淡）跟住就有好淡既酒辣味，完全無味。好唔掂！ 一份花甲份量已經少，再加上碗底既蛤係埋曬口… 跟住上白汁焗海洋飯 哇哇哇，呢個一上就真係哇一聲，白酒花甲唔記得係$58定$68咁細份（係超細份！）呢個飯$48 only但個碗超大，份量十足！ 海鮮都係魚啦、墨魚之類，白汁味道濃郁，最奇怪係食到有陣"羶"味，都唔知點解有呢個味，但我地三個人都有咁既味覺。奇怪！ 鹽燒西冷 呢個係全晚最正！份量同出面食一塊西冷差唔多，上枱時已經切好。我地叫5成熟，見到外層熟但裡面滲緊肉汁既精華。西冷上時已經淋左汁，塊肉好夠味，好juicy，個邊有少少肥膏，經燒過之後，食到熔化左既肉脂香味，西冷夠肉味，有咬口但唔韌。另外仲配左一個汁，點左有D酸酸地味道，不過即使唔點都夠味！回味指數爆燈！ 串燒 四個中最正鹽燒牛舌(左1)，一串就有3舊，舊舊都夠厚身，牛舌面已有鹽粒，燒得外層熟，內裡爽口又夠香，最好既係牛舌夠厚燒完都唔會乾身。 (呢個牛舌咁好食，我地encore要多串…點知出事，唔知點解可以差咁遠，第二串係好油，係見到多到滴出黎既油，同埋牛舌已經變左薄牛舌，水準好唔平均) 雞軟骨燒完皮變乾，無咩味，係靠D鹽粒吊味。 煙肉年糕，用煙肉包住舊年糕，不過煙肉本身已經咸如果再加鹽就over左，可減少鹽份量，外層味濃好彩年糕味淡中和返，年糕煙韌，夾埋都幾好食。 雞賢，如果厚身D就唔會咁乾，但可接受，爽口。 蒜蓉金菇炒天使意如果加多一點顏色會吸睛多一點，本身配料就係金菇同椒絲都係無咩味，就係靠個蒜蓉喇，無咩特別，不過呢個同飯一樣只賣$48，叫做抵食取勝。 巨峰提子疏打配有星星苟篛，得意！ 我覺得呢間鋪裝修環境重於食物，文化博物館環境優美，從餐廳望出去綠草如茵，如果星期六日可以悠悠閑閑咁坐下食下tea hea下會好舒服，而主打既BBQ食物可以試，侍應都有禮，但熱盤都仲有改善空間，希望下次有機會入黎睇展覽可以食到更好食既野啦！
