我響長沙灣返工，平時lunch都係飲茶or茶餐廳就算，今次終於可以食到好野。 呢間叫潮匯館，去到鋪頭就見門口都貼左好多雜誌既介紹，呢度都幾多特色野食，例如生醃賴尿蝦、粿粉… 我地一行4個人，係lunch時間，所以都有午餐，價錢都係三十幾蚊，食茶餐食到悶食下蠔仔粥都幾好。 第一樣上菜係鵝片併墨魚，見相見鵝片鋪得高高的，但都係面一層啦，下面係墨魚同豆腐。墨魚無染色，一樣都係肉質實淨爽口。鵝片肉質尚算嫩滑，個汁唔咸，幾好。 第二樣係老細推介既普寧炸豆腐，話用特製豆腐做，出面食唔到既，上到枱又幾靚喎，炸得件件金黃色，食時可以點汁，減低熱氣。食落去外層脆脆地，好香口，咬落去入面又滑滑地，軟淋淋，豆味濃，有D似炸鮮奶既口感但換上濃郁既豆味。做得不錯，雖然係炸但唔覺油膩。 跟住炸蠔餅，呢個炸得好食，呢個餅比較厚身，食到煙韌，份量又夠大，成個pizza咁大，蠔肉既份量唔算多，但可接受啦，幾好食，我一個人都食左2件pizza咁大既份量！ 之後我地本來想試粿粉，但已經賣曬食唔到，下次先再試喇，咁我地就叫水打麵，普普通通咁啦，似粗身少少既拉麵，另外叫左2個午餐既方魚肉碎粥同瑤柱三絲粥，2個雖然午餐價，但都足料，但因為午餐時間比較短都唔可以慢慢歎，下次再黎食！ 另外最窩心既係，我好鍾意食獅奄，但叫一份得我一個人食又食唔曬，講笑咁問老細可唔可以叫1/4份（哈哈！），估唔到老細話不如我送一份比你試下啦，哇，超開心，而且呢度既獅奄係已經開左邊，唔似得其他地方要自己落手開殼，D類似血水既物體整到污污糟糟，連我同事見到已經開左邊都同我爭食。雖然獅奄size比較細（唔知係咪送既關係）但連埋個醃料食都食到獅奄既鮮甜，而且經我真人測試，完全無肚痛，下次叫份大既再食！ 呢度食物好食，但份量稍大，最好係4個人以上一齊黎食！
