提起芝麻，好多人會諗起中式甜點「菲林卷」、芝麻糊、芝麻糖等，喺日常生活中芝麻多數係用嚟做甜品，好少會將芝麻入菜...... 但係，有啲人唔鍾意食甜品，或者唔鍾意芝麻嘅口感，就有啲可惜，因為芝麻嘅營養價值同食療功效實在太多！據研究指黑芝麻含豐富維他命E，可以延緩衰老，有潤五臟、強筋骨、益氣力等作用。但係我哋平日吃到嘅芝麻製成品多數係芝麻醬同芝麻油，食成粒芝麻對於營養吸收並唔係最好，因為芝麻有一層比較硬嘅膜，要將佢碾碎先可以更容易吸收入面嘅營養。所以，芝麻最好碾碎咗先吃，而黑芝麻嘅營養相對比白芝麻高少少，所以，用嚟補益養生嘅多數都係黑芝麻。記憶中嘅童年，嫲嫲成日會煮芝麻糊俾屋企人食，嗰個味道係非常濃郁香醇，食完仍然唇齒留香，嗰時相信嫲嫲嘅芝麻糊一定係有秘方，嗰種清甜帶有濃厚嘅芝麻香，餘味無窮，喺「熱辣辣」嘅時候食係最好味㗎！後來嫲嫲將秘方話俾我聽，原來芝麻糊稠度同甜度都會影響整體口感，要根據個人口味自行調節，太稠或者太甜嘅，要加啲水去稀釋，同時米漿嘅比例都係決定芝麻糊濃稠度嘅因素。而煮芝麻糊嘅原料除咗黑芝麻、白米、紅糖外，亦會加少少白芝麻，等炒芝麻嘅時候可以睇到芝麻嘅金黃度，先唔會因為炒過龍而變苦澀，再煮多5-10分鐘就煮好喇，但具體時間就要睇火候大小，煮滾至濃稠就食得喇!但注意嘅係，千祈唔好煮過龍，如果唔係會結成塊狀，啱啱好嘅芝麻糊口感應該係細膩順滑、滿口醇香。細個嘅黑芝麻糊係用石磨磨出嚟，隨著科技嘅發展，而家逐漸改用豆漿機、攪拌機去取代繁複工序，但唔可以否認嘅係，手工磨製嘅芝麻糊更香更有情懷，回味嘅仲係溫馨嘅芝麻糊香。今次就就同你哋分享「嫲嫲芝麻糊」嘅做法，等大家可以一齊享受呢份細膩而溫馨嘅芝麻香！ 芝麻糊做法：1. 先將白米浸2小時，瀝水備用。 2. 以白鑊大火不斷翻炒黑白芝麻（約需5至10多分鐘）至乾身。3. 當炒至冒出濃郁芝麻香氣，以及白芝麻變金黃色時，便可盛起待涼。 4. 將白米及清水放入攪拌機中，攪拌至米漿幼滑。 5. 將芝麻及水，分多次加入攪拌機中拌至幼滑。 6. 將芝麻液過篩後，放入大鍋中以中火加熱。7. 加入紅糖不斷攪拌，直至糖完全溶化。 8. 當煮至冒煙時，逐少加入米漿，不斷攪拌煮至濃稠即可。 溫馨提示：• 煮芝麻糊不宜煮滾，否則會油水分離。• 分多次攪拌芝麻及過濾，會令芝麻糊口感更幼滑。• 炒芝麻時加入白芝麻，可憑其色澤變化得知火候是否恰當。• 炒芝麻要注意不宜過火，否則芝麻會帶苦澀味。
