平時都鍾意食啲脆卜卜同濃味嘅嘢食，但係呢啲邪惡美食一般都好容易引致「三高」。加上隨著年紀增長，味覺敏感度下降，煮出嚟啲餸菜有機會偏鹹而影響健康，所以呢啲烹調手法一定要改，應該遵重少鹽少油少糖嘅飲食原則，其實只要揀啱煮食工具，就可以煮到健康又好味嘅菜式。呢幾年好興嘅「氣炸鍋」，煮食原理同焗爐差唔多，係利用內置喺煲內嘅加熱器，產生高溫對流嘅熱風，喺極高溫嘅壓力下，將食物本身嘅油脂同水分溶出，令食物變熟、變脆。換句話講，氣炸鍋係靠食物本身嘅油嚟產生油氣循環，令到煮出嚟嘅食物好似炸物咁酥脆。另外，「易潔鑊」亦係唔錯嘅選擇，佢嘅二層加熱盤設計，令到個鑊受熱均勻，就算大火爆炒嘅時候，都可以低油煙同唔癡底，兼降低油煙對健康影響。所以話只要揀到啱嘅煮食工具，就可以大大減低油分攝取，同時亦可以煮到健康又好食嘅菜式。 材料：板豆腐 － 兩磚鹹蛋黃 － 三隻牛油 － 20克調味料 :糖 － 半茶匙做法: 1. 先以重物壓豆腐10分鐘，去除多餘水份，再用廚紙抹乾。 2. 將鹹蛋黃取出，蒸十分鐘至熟，壓蓉。 3. 豆腐切成大塊，用廚紙吸乾水份。 4. 將豆腐放入氣炸鍋，噴上少許油份，用160度炸12分鐘，再用200度炸5分鐘至金黃，盛起。 5. 易潔鑊以中細火將牛油煮溶。 6. 將鹹蛋蓉加入烹煮至起泡。 7. 加入調味料炒勻後，再將豆腐回鍋 ，炒勻即可。溫馨提示： • 市面上有盒裝板豆腐，亦可到街市購買。 • 可用重物壓去水份，令豆腐更乾身。
