成長喺7、80年代嘅你對於狗仔粉一定有印象! 喺屋邨、安置區，小販推著木頭車、拎著大桶叫賣狗仔粉，係唔少50同60後嘅童年回憶。回憶嘅味道總係最美好，就以一碗「狗仔粉」為例，其實只不過係粘米粉煮成嘅家鄉小食，但係就裝滿以前填飽肚仔嘅幸福滋味～～細個過節嘅時候，外婆都會整家鄉小食「粉仔」，所以以前一知道要去外婆度過節，屋企啲姊妹都會好開心！因為媽媽每次都會拎一個煲仔，等返嚟嘅時候可以打包啲「粉仔」返屋企慢慢食。「粉仔」因為造形頭尾有少少尖好似狗仔條尾咁，所以又叫做「狗仔粉」。其實做法一啲都唔複雜，只不過比較嘥時間同心機。首先要用蝦米、鹹瘦肉、瑤柱同冬菇熬一個濃郁嘅湯頭，等佢味道鮮香而有層次，再用粘米粉同糯米粉加入熱水搓勻，令到粉條更加煙韌，煮好嘅時候會腍身同埋帶少少黏性。食嘅時候將自家製嘅菜脯加入狗仔粉到撈勻，濃郁嘅湯底充滿蝦嘅鮮味，夾雜着爽脆嘅菜脯同煙韌嘅狗仔粉，雖然唔係咩貴嘢，但係就吃到一種家鄉嘅風味。而家諗返起個肚都打鼓，今次就同大家分享一個簡易版嘅狗仔粉，等你哋都可以一齊感受下呢款家鄉美食！唔知大家諗返起細個嘅時候，又最懷念啲咩嘢食呢？家鄉小食 - 狗仔粉 材料：鹹豬肉－200克小冬菇－10隻蝦米－100克紅葱頭－兩個 （切片）小瑤柱－100克粗上海麵－300克熱水－1.5公升雞湯－500毫升做法：1. 冬菇用熱水煲一陣，焗半個鐘之後瀝乾水，切片備用。2. 小瑤柱用水浸過夜，蝦米浸洗完瀝乾水備用。3. 燒熱油鍋，將紅葱頭、鹹豬肉加入，灒酒爆香。4. 將蝦米、小瑤柱同冬菇加入，炒勻。5. 加入雞湯同熱水煮滾，轉中火煮二十分鐘，備用。6. 將上海麵切成小段後放入湯中。7. 煮滾後轉中火 ，再煮十五分鐘即可。小貼士:- 粗上海麵唔駛清洗就可以煮。- 可按個人口味加入唔同份量嘅辣菜脯。
