繼「越南黑工」後,我第二份工作就係一日嘅「粟米廠女工」。 當時因為房東同好多仲介有聯繫,所以偶爾可以為我地提供工作,短期長期都有。 係身無分文,又零收入嘅情況下,唯有咩工都做住先。結果我就去左做一日黑工,時薪係$12澳紙。 由返工開始已經非常艱難,原因係住南面嘅我要遠赴北面工作(澳洲車費比較貴,而且地大,路程較遠) 折騰一輪去到工廠報到後,外籍主管指示我地著上保護衣,紮好頭髮,消毒雙手,確保整齊清潔就可以開始工作。 場入面大部分員工都係黎自台灣,泰國,越南。現場所見,我係唯一一個香港人。一埋位,主管叫其中一個員工指導我,由於都係「手板眼見功夫」,所以都係教左兩句就自己開始做。 我地嘅工作係將粟米整理乾淨再入盒,一啲好重覆性嘅工作,接下來就係講求速度,因為你旁邊嘅輸送帶會將一舊舊切好嘅粟米不停送出黎,一唔夠快就會俾主管鬧。 同事之間亦鮮有交流,都係快快手,密密做,重覆又重覆,同機器無分別。 可幸嘅係每工作一個鐘就可以休息五分鐘,算係俾肌肉暫時舒緩一下。 完成一個早上嘅粟米,再經過二十分鐘嘅午飯之後,我就開始同原條粟米同荷蘭豆玩遊戲。 首先我被分派到另一條輸送帶,負責分開靚粟米同爛粟米。係呢邊,粟米嘅輸送速度更快。我地要將爛粟米丟到對面嘅籃入面,有一刻我覺得自己就好似「櫻木花道」上身咁,球球三分穿針入網。 完成粟米之後,我就被分配去包裝荷蘭豆,亦係意想不到最辛苦嘅一Part。因為新手嘅我要係無自備手套嘅情況下,徒手將一堆堆冰凍嘅豆放入盒,係「冰鎮手指」下不時傳來一陣陣刺痛。 當由早上九點做到至晚上九點(未計早起搭車返工),諗住終於可以快啲返屋企沖個涼訓個靚覺,結果仲要用多兩個鐘先返到屋企(火車後再駁公車…)orz … 冷知識:係柏斯,晚上交通工具嘅行車班次係非常之疏落,每班火車相隔嘅時間係半個鐘。好不幸地我岩岩錯過左一班火車,就唯有忍著餓,抵著凍咁等下一班車… 總結一日工作:非常體力勞動,好似玩緊「眼明手快」咁。工作咗只係一日,肌肉已經非常酸痛,雖然習慣下就好,不過長期落去,好容易會有永久性肌肉損害。 不過依然好多人為左錢會頂硬上,原因係工廠時數通常比較穩定,收入有保證,所以當初我都視工廠為搵工目標。 但工廠通常處於偏遠位置同上班時間比較早(例如凌晨四,五點),所以無車牌嘅我要番工係非常有難度…亦造就我之後踏上飲食業之路… 【 Facebook專頁】 當Cony遇上Brown 【Instagram 】 cony_luv_brown