到咗柏斯幾日之後，同行嘅朋友係房東介紹下得到一份工廠工作。由於得一個名額嘅關係，我就繼續孤身走我路，去唔同嘅仲介（Agent）同埋商場瘋狂投履歷。最後係屋企附近嘅大型商場Westfield Carousel投到一間越南餐廳。 我放低履歷之後唔夠兩分鐘，佢地就打番俾我：「你而家方便試工嗎？」 當下我即答：「可以。」（無業遊民嘅我已經心急如焚了，仲有咩可能Say No） 然後佢同我講試工由朝早11點到下晝5點，我亦都無問乜野直接開始。工作其實不難，就收銀，出菜，拎野飲。工作氣氛一般，反正係第一次見面，都唔會有咩期望。 完成工作後，佢地話因為負責請人嘅今天唔係度，所以請你聽日再試一次工，由朝早8點到中午12點。我又係一句：「可以。」（事後先覺得明知負責人唔係度點解要我今日試工＄＃％＃︿％＄︿） 第二日，我按照時間工作，過程亦都正常無誤，到收工嘅時侯。佢同我講因為有人就黎唔做，要同佢夾番更表幾時可以俾我番，聽日就會Send番個時間表俾我。 好天真好傻嘅我，深信不疑，懷住愉快嘅心情返到Sharehouse（雖然佢俾我嘅時薪只有＄8一個鐘…超・黑・工） 我等咗一日，等咗兩日，等咗三日…結果係無回覆。 室友們一致嘅總結就係：你・被・人・呃・咗・啦！ 其實係澳洲「試工」都係要出糧，只係我初到貴境仲係一隻好純嘅羊（或者係一隻好蠢嘅豬），所以就無爭取，結果好成功咁幫佢地做左兩日免費勞工。 事實上澳洲好多鋪頭都會以呢個手法去呃人返黎幫手，不過主要都係以華人店居多。（非歧視，但呢個係事實） 雖然第一次嘅澳洲工作體驗就咁被免費拿走，不過我亦因此上咗澳洲打工第一課。 接住落黎就會介紹其他工作，記住留意啦！ 冷知識：當時法定嘅最低工資大約係時薪17澳紙 【 Facebook專頁】 當Cony遇上Brown 【Instagram 】 cony_luv_brown
