圖片來源：http://www.japantimes.co.jp/news/2014/10/07/national/firms-target-share-houses-boost-business/ 1）痴飲痴食型 人在異鄉，互相幫助，各展所長本應係好正常嘅事。唔識備料可以幫手買餸，唔識煮飯可以幫手洗碗，咩都唔識都可以幫手Set枱開飯。但最怕有人覺得係“老馮”，咩都唔做，淨係識食。食完拍拍蘿柚就ByeBye。唔通佢以為自己係澳洲請咗個「得成女傭」？ 2）生活初哥型 我地呢代人，好多都好幸福，係屋企咩都唔駛做，衫唔駛洗，飯唔駛煮，地唔駛拖。正因為咁，好多人連基本嘅生活技能都無。唔識唔緊要，最緊要肯學，唔好有意外就可以。試過好多次有人想將金屬放入微波爐入面叮…真係嚇到成屋人一額冷汗。 圖片來源：https://www.tesco-baby.com/baby/baby-health/coping-with-colic/ 3）整容磨皮型 呢度唔係講緊真係整容嘅人，而係講喺廁所十世，好似要換埋皮先肯出黎嘅人。一間Sharehouse閒閒地7至8個人，多起上黎可以去到18個。但廁所可能就得一兩個，撞岩返工時間，個個都心急如焚，仲要排隊等廁所，真係一朝早大家都上晒彈準備開火咁。 4）原始野人型 原始野人嘅意思係…佢地比較喜歡貼近大自然嘅生活…可以一身臭汗但係幾日都唔沖涼。好似有位每日辛勞做園林工作嘅朋友，日曬雨淋，香汗淋漓。但係一返到屋企佢就九秒九除衫…上床訓覺，咁嘅情況可以反反覆覆維持好幾日。可惜同房嘅朋友都只可以用口呼吸。（仲未計入房唔小心踩落佢件濕透嘅衫…） 圖片來源：http://www.girlsaskguys.com/other/q1495787-why-doesn-t-tarzan-have-a-beard 5）無手無尾型 自己的事自己做，相信呢個係小學生都識嘅道理。不過係澳洲好多人都會選擇性刪除。食完野唔洗碗，去完廁所唔沖廁，垃圾桶滿左唔清理，一副「側側膊，唔多覺」嘅心態。忍受唔住嘅人就會自動幫佢執手尾，到問起時佢又會自動神隱或者自動消聲…而其他人留低嘅，只係一臉無奈。 圖片來源：http://www.stuff-about.com/2010/09/5-brilliant-ideas-to-make-you.html 6）色情男女型 情到濃時，好多野又真係控制唔到嘅。不過成屋都係人，最好都係將聲量收細，唔係個個都鍾意睇AV，重要係4D個隻。有朋友話，試過深夜時份，同房就係旁邊激戰，嚇到佢氣都唔敢抖多啖，郁都唔敢郁，費事俾人知佢醒左打擾人地雅興之餘，自己之後唔知點樣面對佢地… 圖片來源：http://crapisgood.com/jackson-eaton/ 其實一齊生活最緊要係做好本份，互相尊重。我好慶幸係一路上遇到嘅大部分都係自理能力良好嘅人。唔想成為全屋焦點就記住唔好成為以上任何一類啦 。(笑) 【 Facebook專頁】 當Cony遇上Brown 【Instagram 】 cony_luv_brown
