真係估唔到閨蜜同我差唔多時間被求婚，所以籌備婚禮嘅好多嘢我地都可以一齊搞，例如係一齊行婚展搜集資料格價，一齊去試婚紗，互相俾下意見咁（女仔眼光比較信得過~）不過今次我地就唔係去租婚紗租裙褂，而係租金器，係咪有啲特別呢？事源我無意中喺網上發現間金鋪除咗買金器仲可以租借一手金器，覺得呢個concept幾正，就約埋閨蜜同我一齊上去睇下款。首先真係要多謝今次serve我地嘅店員，因為我同閨蜜兩個對金器真係一竅不通，又唔知有咩金器款式，金器花紋有咩寓意，真係全靠佢介紹啲款俾我地。 入到去真係勁多金睇，有幾個飾櫃放滿晒金器，我地坐低之後，首先就當然睇龍鳳鈪先啦，真係超多款！店員就介紹咗幾款俾我地睇，有磨砂啞身款，亮面款同立體款，佢話每個人鍾意嘅款式都唔同，可以戴晒幾款上手比較下，睇下鐘意邊款多啲。試戴個陣佢仲教埋我地個扣要點開，同埋點樣戴啲龍鳳鈪先冇咁易變形，唔講都唔知原來有咁多小技巧。試晒三款之後我同閨蜜都覺得磨砂款最靚，啲款式望落都好新潮，唔會好老氣。立體款就真係要睇人，手腕太細嘅真係未必carry到。 試完龍鳳鈪之後仲睇咗金頸鏈，呢次我同閨蜜就有唔同睇法啦。佢就覺得龍鳳鏈做工精細，款式大氣啲，而我就鐘意花鏈，有層次，寓意花開富貴、幸福美滿。 再黎就係我今日最鐘意嘅金器——足金髮簪！其實我係試頸鏈個陣無意中見到其他客睇緊，問落先知原來係足金髮簪，呢類金器平時真係好少見，我見幾靚咁就叫店員拎埋俾我地睇下。 估唔到我地兩個又真係越睇越鐘意，而且價錢都唔貴，呢幾款都係around $6000。最後我地就決定互相買支俾對方做結婚禮物，比起送手鏈送戒指，呢樣真係特別好多，款式又夠精緻，而且BIG DAY果日著掛一定用得著。至於租金器我就仲考慮緊，啲店員都好nice，知我未同四大長老商量都叫我返去問下老人家意見先，仲叫我影定多啲款返去俾佢地睇下，如果有興趣既話下次可以帶埋長老們黎試款。大家如果有興趣租金器或者買金器嘅話都可以去睇下，佢哋真係好好服務架！
