四月復活節期間,我相信部份女生同我一樣,因為疫情關係,所以留係屋企。而中午時段適逢家人開電視,一開電視就重播一套電影 - 絕世好BRA! (無錯🤣 我年紀比較大,所以我中學時期就有睇呢套電影🤣)細個睇呢套戲覺得笑片一套,無含意。但到大個同埋依家有涉獵內衣,就有多少身同感受。 BRA! 呢一個字對各位女生完全唔陌生!我大概可以話BRA同女生既關係比起親人或愛人同女生更加親密。原因係我地女生每日最少8個鐘都會著住佢。但大家返工見面同傾計時間都未必多過3小時。可想而知,BRA對女生有幾重要。但重要還重要,有幾多個女生係真係識㨂岩自己既BRA?唔知大家對㨂胸BRA既條件係咩!因為市場上都有好多不同款式!近10年,坊間多左好多功能內衣,其中一間個Slogan仲話「戴錯胸圍著錯BRA」。原因係其實著胸圍都有好多野要注意。而呢套「絕世好BRA」正正有部分講出呢樣野,而更加特別係加入左男性對胸圍既想法。我唔可以話男性都胸圍係無知,因為佢地身上少兩團肉,永遠唔明白女生既辛苦!而大部分男生仲以大胸纖腰作為擇偶條件。唔係話無可能,其實,男生如果代入女生去諗,如果你身上有兩舊大約5-10磅既肉係上身,但擁有纖腰,個人其實上身會慢慢向前傾,因為會好攰。 眼見好多明星或者女生會因為咁去隆胸,我會覺得有少少辛苦。我自己胸部唔算太細,所以非常有感胸大既痛苦。特別係夏天同經期前。夏天辛苦原因係有一個緊貼自己身體既布包住,入面流汗濕住好焗;而經期前係因為荷爾蒙影響乳腺會增新,所以會漲痛。有時同我另一半講,佢未必能夠好了解,但佢都會感到我既辛苦。而呢套戲最後有個亮點係話世上係唔會有絕世好BRA! 因為最好既BRA就係有一個人擁抱你既安全感!而我係絕對認同。因為我都買過好多唔同既品牌,就算個牌子標榜有幾舒適,都唔夠有一對手包裹住咁舒服!我知道一定有女生會同我講話,咁都要有人幫你包先得架!我想話,我覺得最舒服其實就係自己托住!因為對方都未必可以岩力度,但只有自己先可以拿捏到最適合自己既力度同安全感!