點擊圖片放大 +4 旺角有一間海鮮菜館翻新裝修，門面都幾有氣派，望入去裝修好華麗，大枱比較多，門口水缸裝滿着新鮮嘅海鮮，我哋當然唔少得食海鮮餐啊。 點擊圖片放大 +4 「旺角滋味六寶碟」中有白灼韭菜花， 深海魷魚， 豬脷， 豬肚，粉腸同埋丹山海蜇等，有我至愛嘅豬脷，切到一片片而且好大塊，咬落去好軟身爽口，再配埋辣椒豉油，非常滋味。 湯水方面就係「傳統杏汁燉豬肺湯」，一大煲燉好咗嘅湯我哋八個人一齊分，一人可以飲到兩至三碗。豬肺湯好香，飲落去好鮮甜，豬肺亦好大大嚿，咬落去好爽口，完全飲唔到任何味精，非常足料，必飲！ 「黑胡椒波士頓龍蝦」大大隻切成一件件，龍蝦表面有好香濃嘅黑胡椒汁，再配以食落去啖啖爽口嘅龍蝦肉，真係冇得頂！ 食完龍蝦之後，當然唔少得叫返個「招牌避風塘炒辣蟹」，辣蟹都係切成一件件，面頭有啲避風塘醬汁。另外，廚房仲好體貼，將啲蟹殼敲爛咗，等客人容易搣嚟食。食落去又係啖啖肉，蟹鉗好大隻，一啖咬落去好有鮮味，呢度嘅海鮮真係好正。 「避風塘炒大蜆」好大碟而且份量都幾多，每一隻蜆肉都好大隻，食落去完全冇沙，醬汁亦都好滋味。 「新鮮菠蘿咕嚕肉」酸酸甜甜嘅味道好醒胃，咕嚕肉炸到外脆內軟，而且外面脆卜卜嘅表皮有啲酸甜汁，有脆有軟嘅口感。另外，仲有新鮮一粒粒嘅菠蘿，食落去唔酸，反而好甜。 「旺角風沙雞」嘅食物名稱已經好地道，風沙雞外皮炸到好香脆，咬落去肉質鮮嫩，爽口彈牙，肉汁已經，滲透晒出嚟，雞非常新鮮，好味道。 最後再嚟個「白松露油野菌炆伊麵」，起初望落去賣相好似好油膩，原來係白松露油嚟，食落去麵好滑，咬落去麵質煙靭，唔錯。 夏日炎炎，最後整返個甜品「綠豆沙」清下熱氣。 總括而言，呢度啲海鮮仲好食過西貢，食海鮮呢都係唔錯嘅選擇。 旺角海鮮菜館 地址 旺角洗衣街153號地舖 G/F, 153 Sai Yee Street, Mong Kok 港鐵旺角站 B3 出口, 步行約5分鐘 電話號碼 23952883
