#1 Couch Surfing，沙發衝浪。 係2014年6月13-15號，我同我既好朋友Joey係愛丁堡第一次嘗試左couch surfing，係兩個波蘭仔屋企訓左兩晚...... 老實講，無啦啦走上個陌生人屋企訓都咪話唔危險。雖然睇過唔少Surfers打blog分享佢地d好好既經驗，但係我亦都聽唔少身邊女仔朋友d好差既經歷，所以如果今次唔係礙於budget真係好有限，我都唔會試couch surfing。 但係有時人生就係咁，唔係你話唔想/唔會/唔做，就真係唔會做；如果有d事注定要發生，有d人你注定會遇到，去到某一個點佢地就會自動埋位，絕對唔需要，亦都唔允許你plan。今次couch surfing既經歷就係一個活生生既例子。 如果要用一個字黎形容呢次既經歷，我絕對會用“Amazing”！ 首先，Couch Surfing，顧名思義就係surfing on couch，即係訓梳化。不過其實我做哂心理準備訓地下，或者訓街（如果佢地叫我地同佢地訓）。所以對我地黎講，有梳化訓已經係bonus，但係點知我地有床訓不特止，仲有間房！！！ 呢個都唔係重點，重點係間屋個location竟然係Royal Mile，係正個Castle隔離，同個castle差唔多份量......簡單d黎講，即係我地唔使錢就有得住castle（kind of）！！而我地既host更可能係我暫時遇過最好既人！ 仲記得一開始係Couch Surfing個網度搵host，見到呢個波蘭仔有咁多個正評，個個surfer都捧到佢上天，直情用埋“This beautiful soul”黎形容佢...... 老實講，其實我個陣都有一刻懷疑過係咪做梅。因為佢張張相都好wild，著住條草裙伸哂脷咁，仲要揸住個斧頭......總之就癲癲地。但係因為我見到佢不論男定女，咩種族都照host，應該唔係變態佬，掛。 所以就膽粗粗send左個request俾佢，心諗如果佢reject就最多唔去愛丁堡。點知我個無厘頭request竟然可以係幾百人中突圍而出獲到佢既青睞（根據佢講，每日閒閒地都百幾個requests），就係咁我同Joey就係咁依執件衫（underwear都冇帶，涼都唔打算沖），就咁就向愛丁堡出發。 本住「對住癲既人，一定表現得比佢地更癲更喪，唔可以怯」呢個宗旨，我係入屋之前已經諗定幾個開場，例如一見到佢就整個功夫pose－「哈！」俾個下馬威佢睇下，或者黎個Rocker “Roar”等佢覺得我地係同類等等。 點知最後我地既見面動作竟然係......最簡單既“Hi”加hug。 原來人真係真係不可以貌相。 我以為呢個看似瘋癲既人，會係個d嗜酒吸煙食大麻既反叛青年，但事實係，佢係一個好有原則既人，好清楚自己做緊乜野，而且好知道自己追求d咩。佢係一個好知足既人，大自然就係佢既遊樂場；佢唔會盲目地追隨潮流，相反，令佢自豪既正正係因為佢同人唔同。佢唔會刻意改變自己去迎合大眾，因為佢深信每一個人都係獨一無異的，而且每人都有自己存在既價值。 佢同佢既flatmate，另一個波蘭仔，大概係我暫時親身遇過（除家人以外）最無私同最有愛既人。 右一就係個波蘭仔，左一就係波蘭仔個flatmate（都係波蘭仔），中間就係佢地既鄰居蘇格蘭仔 雖然佢地每朝都要5點半起身番工，但佢地幾乎每一日都有host人。最令我impressed既係，佢地唔係就咁讓間房讓張床俾d surfers訓就算，佢地係會同你分享佢地既所有野（鎖匙都俾埋你），又煮野俾你食，仲會開枝polish vodka同你一路飲一路分享對呢個世界既睇法，傾到凌晨先去訓，有時訓得半個鐘又要起身番工。 對人好，說易不易，但其實說難也不算太難；但對陌生人好卻是好很難。 試想像，如果你個朋友無啦啦話要黎你屋企借宿幾宵，訓你間房，用你個廁所，再用埋你個廚房，我諗都唔係個個肯制。 但佢地卻由三月入住呢個地方開始，幾乎每一日都招待不同的陌生人，試過俾人偷野，又試過一放工番到屋企驚見間屋堆滿十幾個人，仲要有人食煙食到爭d火燭，連牆都燒到燶左撻.....但佢地依然繼續host人。無他，就係想身體力行話俾世界知“Happiness is only real when shared”，用生命影響生命。 一句講哂，今次之旅我地真係好好好彩。 除左因為我地冇遇到壞人，可以平安番屋企之外，更加因為我地遇到呢兩個波蘭仔！ 最後，引用佢成日講既另一句說話: “If you're not making someone else's life better, then you're wasting your time.” 呢個係佢地俾我地既reference，實在係太sweet :')
