隨著新年的過去，我的生活重新走回正軌。 單單查看電話的留言及回覆訊息就佔用了我三小時。 打從心底地感恩遇到三位對自己不離不棄的「朋友」， 也許我過年期間的「靜音」模式令他們急壞了！ 利百加擔心我被 ML 騙走了， ML 急不及待要面對面向我澄清某些誤會， 而 Tyler 則想帶我去一個地方⋯⋯ 但其實我的心思意念都已經繫在 Eman 的離線狀態中。 好吧！新一年先把煩事統統處理掉！ 氣定神閒地告訴利百加，ML 不是我的茶！ 讓她安心完成她的歐洲之行回來後再詳談！ ML，約我來到海邊的小咖啡屋享用下午茶， 這個塲景應該有好幾小時的心路歷程要細訴吧！ 今天，他雖然依舊打扮講究，但看起來總是有點忐忑。 他點了一杯藍山咖啡，深深地吸了一口氣，開始說： ML：「呢個新年係我三十幾年來過得最不安嘅！」 他低頭說著，偷看了我一眼，我微笑一下示意他繼續。 ML：「果晚之後，你就冇再開電話，我唔知道利百加講左乜野，但我覺得我有啲野應該需要坦白，有啲野需要好好澄清！我唔想你誤會我，我想你知道，我好睇重我地嘅關係，那怕係我地只係啱啱識，我喺你心入面未有任何定位都好，我唔想你對我有任何唔好嘅感覺！」 我仍然保持沉默及微笑，眼神是温柔的，我相信這個反應有助他能平伏心情。 ML：「我有個囡，今年小學畢業。12年前我年少氣盛，同女朋友分左手之後根本唔知道佢有左BB，直至有日佢妹妹 Sarah 抱住BB揾我，我先知道佢生BB果陣失血過多死左，佢一直同Sarah相依為命冇其他親戚，所以我就肩負起照顧BB同Sarah嘅責任，無可否認，我個囡係我同Sarah一齊湊大嘅，我好感激佢當BB係自己個囡咁看待，但唔知由幾時開始佢真係當左我地係一家三口，我明白係我處理得唔好，我好似誤左佢一生咁，不過我真係當Sarah係我自己個妹架！」 我完全沒有心理準備聽到這個可能是真人真事的故事，一時之間我無言以對。 ML：「我認我對你係一見鍾情！我認我有私心想過隱瞞自己嘅過去！我都唔敢奢望你會接受我有個囡！我都知道我比假希望Sarah係我唔啱！但你信我！遇到你之後，我第一次知道自己想為一個人努力去追求愛情！所以我先鼓起勇氣去同你坦白一切！」 （待續）
