今日想逐一評價呢一年用過既10樣頭髮保養產品,另外更分享個人護髮tips比大家。 本人屬中性至油性髮質,可作參考。 (一) 深層清潔 先講深層清潔,呢類型既洗頭水可以徹底清洗頭皮上既多餘油份以及頭髮造型產品中既化學成份,適合油性髮質同成日用頭髮造型產品既人使用。 通常我都會一星期用3至4次左右。 1. TRESemmé Deep Cleansing Shampoo 當中成份有檸檬同Vitamin C, 主要為深層清潔作用,潔力十足,控油都ok , 但洗完個頭會扁塌,而且補濕麻麻唔太夠,有d乾,乾性髮質不太合適。 2. CLEAR 控油平衡洗頭水 (試用) 成份除左有檸檬精油,仲有Nutrium 10 抗屑補濕因子,可以清潔控油之餘,更做到補濕去頭皮作用,洗完唔會太乾,日日用都可以。 (二) 日常清潔 深層清潔後,再用有滋潤及修護成份既洗頭水清潔頭皮,我會經常轉換唔同既洗頭水,試試唔同效果。 1. TSUBAKI Damage Care 山茶花洗頭水 呢隻係我最鍾意既洗頭水,起到好多泡,洗得好舒服,非常滋潤,另外山茶花油有修護成份,洗完頭髮變得好柔軟順滑,而且有淡淡香味。 TSUBAKI其實係shiseido旗下平價品牌,有品質保證。 係阿信屋kawaiiland會搵到有補充裝賣,比一枝枝買更平。 絕.對.回.購. 2. CLEAR 多效水護洗頭水 (試用) 成份有維他命及Nutrium 10 抗屑補濕因子,可以做到抗屑效果,但補濕效果一般,個人唔太滿意效果。 3. Style Aroma Hair Loss Control Shampoo (試用) 呢款以色列品牌既洗頭水以天然成份製成,配合專利天然抗老化技術。 而且我好欣賞呢款洗頭水冇經過任何動物測試,並標明不含 SLS/SLES 及 parabens,可以令人放心使用。 補濕效果還可以,可能乾性髮質未必足夠,而針對既防脫髮效果不太顯著。 4.Head & Shoulders 去屑洗髮乳 敏感呵護 含雙重鋅因子,吸收底層頭屑,並添加蘆薈精萃,為敏感頭皮呵護。 洗完後頭髮變得好順滑,滋潤度都可以,做到去屑效果。 (三)護髮 護髮係最重要既一環! 針對你自己頭髮既問題,搵岩一款好既護髮產品, 可以令你頭髮生長得更靚更柔順架!! Tips: 洗完頭,我會用護髮素,間中會敷埋hair mask, 大約待5分鐘多左右比佢吸收,唔好搽到頭皮。 呢一步不可缺少,可以做到明顯既修護滋潤效果架! 1. Aussie Miracle Moist Conditioner 含有澳洲macadamia nut oil,有滋養修復重建及保濕功能。 香味都幾勁,洗完個頭超香,可以留到第二日既晏就, 試過有朋友聞得出走黎問我用咩洗頭水 。 但補濕滋潤其實唔太夠,用既時候又要擠好多先夠用搽哂髮尾。 價錢都唔平,又細枝,覺得唔太抵用,未必回購。 2.韓國「呂」人參護髮素 (紅色) 適合中性極損傷髮質,採用鏡玉山生地黃、人參、白茯苓等各種中草藥精華萃取而成。 洗完會有一大陣好濃既人參味,個人都可接受既。 保護修護唔錯,但頭髮都唔太滑。 3. L'OREAL Total 5 Repair Mask 針對5種嚴重受損頭髮問題 (折斷、乾燥、暗啞、粗糙、髮尾分叉),做到基本滋潤修護功能,但效果較短暫。 敷完之後勁滑勁香,香味可以留到第2日既晏就. (四)保養 Tips: 吹頭前,襯頭髮上鱗片仍然處於打開狀態,搽上可以濕髮上既hair oil, 用手心既熱力按壓落頭髮上,並用手指逐束頭髮捲捲。 待頭髮半乾時先吹頭,千其唔好不停用毛巾扭乾摩擦頭髮,亦都唔好太近距離用過熱既風吹頭,傷害頭髮,咁樣既話做幾多頭髮護理都冇用架啦! 1. Oriental Princess Cuticle Heat Treatment 呢枝購於泰國,可以濕髮乾髮上。 佢雖然係油性質地,有olive oil同jojoba oil, 但放上頭髮唔會好lup。 而且佢具備防UV功能,避免紫外線曬傷頭髮。 我會通常會吹頭前同出門口前用,夾頭髮前都會用到。