禽日聽個friend喺度呻，話佢同女朋友原本有90%夾，相處到宜家，淨番80%，佢話:“唉!咁遲D會唔會得番50%㗎?”，我聽咗之後有D感想好想講吓。 首先，2個人認識咗一段時間之後，佢原來嘅形態就會show出嚟，咁係好正常，並唔係差咗，係佢原本就係咁，只不過你宜家先開始認識佢啫。例如(只係例子咋)，男朋友喺自己屋企係細仔，亞媽乜鬼都唔洗佢做，佢初初識你都會做少少嘢照顧吓你，慢慢就會做番佢自己，即係可能乜鬼都唔做；又例如女朋友喺屋企裡面係大家姐，佢慣咗揸fit話事已經好多年，初初識你，佢可能會俾面你就吓你，咁係因為大家未夠熟，佢未肯定你接唔接受到佢，但當大家熟咗，佢知道你接受咗佢，佢自然會做番佢自己，即係好似我哋對住屋企人咁。相反，如果佢長期覺得對住你嘅時候做唔番佢自己，咁係另一件更衰嘅事，造成另一個問題。 Tips: 1. 如果想知你識咗冇幾耐嘅男/女朋友嘅真身係點?最直接嘅方法就係觀察佢同佢亞爸亞媽兄弟姊妹係點相處咪知囉! 2. 想知你同佢住埋一齊會係點，就要觀察吓佢宜家喺自己屋企個格係點喇!
