第1次寫空瓶分享~~產品會比較多~希望大家唔會睇得太辛苦啦~~ 今次會分享8個品牌嘅11件產品~其中8件係護膚3件係化妝品~(化妝品實在太難用得曬啦!!) 希望對大家黎講有參考價值啦~~ SHISEIDO產品有2件~~ ULTIMUNE紅妍肌活精華 (HK$860 / 50ml) 個人感想:★★★☆☆ 買左50ML~早晚都用, 大概2個半月用曬~~ 個人覺得都OK嘅! 我係混合偏油肌, 用佢唔錯! 吸收快又唔笠~~而且以肌底液黎講佢價錢唔算貴, 絕對試得過!雖然唔笠, 但佢又未至於水到查完好似冇查咁~夏天的話絕對可以當埋精華素, 揸完佢直接揸面霜~~不過冬天就略嫌唔夠~我加左YSL紫瓶精華素黎用~~ 至於效果…佢官方係話增強免疫力加強後續產品吸收~不過SORRY, 增強免疫力哩家野實在有啲空範, 我用曬都唔知到底有冇增強到免疫力…不過用左佢之後感覺上粉係貼左同埋皮膚嘅ISSUE係少左! 所以都OK啦! 至於回購, 我會試埋另一個好出名嘅肌底液- LANCOME小黑瓶之後再考慮回購邊一支啦~~ SHISEIDO REVITAL Wrinklelift Retino Science AA EYE MASK 12片 HK$430.00 個人感想:★★★★☆ 哩個真係要推介~個人覺得佢對去眼紋嘅即時效果做得好好!我嘅眼部問題主要係乾紋同浮腫, 前者佢真係針對到~ 價錢都好合理~推介有乾紋嘅SIS用呀~~我已回購左3盒~~ 之後係介紹FRESH~我真係好中意哩個品牌~佢成份好天然~用完就算效果未如理想, 都一定唔會變差或敏感~~另外佢嘅包裝低調得黎高貴都好得我心呀!! FRESH嘅面膜最出名, 所以我4種都有買~(玫瑰 / 黃糖 / 黑茶 / 蜂蜜) 另外亦有買佢其他產品, 今次介紹用清嘅3款先!! 紅茶抗皺緊緻精華眼霜(HK$800 / 15ml) 個人感想:★★★ ★☆ 用清嘅係SAMPLE~我冇買黎用呀! 不過佢出嘅時候拎左超多SAMPLE!我諗拎埋拎埋都有貨SIZE嘅份量啦! 所以都用左差唔多2個月! 我係朝早用佢, 夜晚用FRESH古源注顏修護眼霜嘅~黑茶哩款比較得我心~佢查上眼有少少清涼感, 對去浮腫功效唔錯!哩個都係我朝早用佢嘅原因~~ 質感係好SOFT嘅~查左之後按摩一陣就好快吸收~滋潤度夠之餘唔笠~我幾中意! 不過好貴呀~~雖然都知好用嘅EYE CREAM係好比精華素嘅價錢, 不過都係好難回購…有機會的話先考慮回購佢啦! 古源注顏修護眼霜(HK$1050/ 15g) 個人感想:★★★ ☆☆ 雖然得15g(注意係g, 唔係ml) 不過足足用左半年先用曬!!(我only夜晚用) 佢嘅質感係非一般地”杰”身! 好似凍住嘅牛油咁~(咁當然唔會杰到你挖唔到黎用啦~) 用佢之前一定要做一個動作, 就係用無名指按暖佢, 佢會變返SOFT~如果唔係, 保證你一定出油脂粒! 佢係一款好滋潤嘅EYE CREAM, 所以我覺得適合夜晚用~朝早用就太笠啦! 至於功效, 官方話係淡化衰老徵兆，減褪浮腫，帶來極致滋養。WELL, 只有極致滋養我係感覺到, 用左佢之後眼周皮膚乾係有改善, 上妝唔會乾到唔知點咁, 減褪浮腫方面完全唔覺, 淡化衰老徵兆我又唔覺眼紋少左, 所以唔太推介啦!仲要價錢好貴呢!哩個價錢可以買到更好嘅! 冬天都差不多完啦, FRESH哩2款EYE CREAM用曬我會轉用都係FRESH嘅睡蓮青春活膚眼霜, 到時再返黎報告感想! FRESH玫瑰保濕面膜(HK$540/ 100ml) 個人感想:★★★ ★☆ FRESH嘅玫瑰 / 黃糖 / 黑茶面膜我差不多係同一時間買, 率先用完嘅就係玫瑰保濕面膜!真係超推介, 雖然我知好多好多人推佢, 不過都係要再推下!!真係好好用呀! 佢保濕效果好好, 用完塊面飲飽水咁, 第2朝化妝真係貼D~ 陣玫瑰花味天然又好聞當然都係賣點之一啦~哈哈~~ 等用咁D面膜之後會再返去回購!! KIEHL’S金盞花植物精華爽膚水(HK$330/ 250ml) 個人感想:★★★ ☆☆ 超多人推嘅金盞花爽膚水(同洗面), 試左之後覺得係OK嘅!清爽得黎保濕, 查完非常舒服! 不過呢…價錢唔平囉…爽膚水真係有必要用到哩個價錢?我寧願用D錢黎買精華素同EYE CREAM甚至MASK~ 試過就算, 大概唔會回購了…爽膚水用返極潤就算! TONYMOLY 眼膜(價錢忘記/30對) 個人感想:★★ ☆ ☆☆ 幾經辛苦終於用曬~~不過真心覺得冇咩用…想當年佢嘅蝸牛面膜都好出名, 不過同樣地我覺得冇咩功效…哩個蝸牛MASK係GEL狀, 其實都幾FIT眼型FU落亦幾舒服, 不過就真係零功效, 又唔補水, 又唔去紋, FU完第2日眼周皮膚依然係乾, 唔上妝。 曾經我比TONYMOLY哩個牌子燒著曬買左好幾樣產品黎試, 不過多數失望收場。睇黎韓國野都係唔太啱我… LANCOME 速效眼部卸妝水 (HKD260/125ML) 個人感想:★★★☆☆ 我哩支係買野送嘅~~睇返先知原來係貨SIZE! LANCOME送SAMPLE又係唔手軟架~~ 感想係, 普通啦~~唔特別~我覺得好多$100以內嘅眼唇卸妝都有一樣效果~~又唔使特別買佢嘅~ CHANEL 自然亮肌蜜粉餅SPF 15 / PA++ (價錢忘記, 應該係$4XX) 個人感想:★★★★☆ 典型被包裝打敗而入手嘅粉底~ CHANEL 粉底完全係身份象徵啦~~ CHANEL 粉底一向質素都有保證, 粉質幼細親和力強, 透薄自然唔會令人感覺好厚粉~~而且佢有少少香味, 查個時聞住個陣香味真係好正~~哈哈~~ 要數缺點, 應該就係遮瑕力比較低啦~~不過因為佢係SELL透薄自然, 所以都予左呢~~至於回購, 其實真係好想好想回購, 不過又想試新野, 所以就買左YSL粉底黎試~其實仲想試埋GUCCI! 所以CHANEL暫時未必會回購啦~不過我覺得我有朝一日係一定會重投佢懷抱嘅!! BOBBI BROWN Creamy Concealer Kit(HKD330) 個人感想:★★★ ☆☆ 朋友送嘅遮瑕膏~~唔厚重又幾易推開, 我覺得都OK~~不過我本身黑眼圈唔算好深, 係遮雀斑反而更多~所以用曬之後已經轉左筆狀遮瑕啦~~ JILL STUART 胭脂(HKD340) 個人感想:★★★★☆ 絕對係我其中一件至愛!已回購第3盒!!佢嘅粉質幼細, 有少少閃粉, 顏色種類多, 一定可以搵到啱自己嘅~~ 而且唔容易掉色, 基本上HOLD一日唔使補係OK嘅! 容量都多, 一盒可以用好長時間!!(相中嘅第2盒見左底, 所以買左第3盒, 點知買左差唔多3個月, 第2盒都未清曬!! 我好想開第3盒呀!!) 再加上包裝咁靚, 邊有可能唔買先!! 今次分享住咁多先~~多謝收睇!! 歡迎聯絡我^^ : gackt_misery@hotmail.com theZtyle : http://www.theztyle.com/?79394 UBeauty : https://blog.ulifestyle.com.hk/blogger/chris0519/
