近年，好多餐廳都專登裝修到好似啲懷舊冰室呀扒房咁， 但元朗有間餐廳，唔使裝修都好有懷舊扒房feel， 皆因呢間餐廳廿年都應該冇裝修過， 佢就係安娜餐廳啦！ 安娜以前喺元朗黎講都算係「高級餐廳」，用餐價錢中上，裝修行高檔路線，但一直都唔算係長龍店⋯⋯ 廿年了，裝修無改變，甚至變得殘舊， 但慶幸價錢都無咩改變（起碼同我讀書時差不多），所以相對黎講變得抵食。 是日晚餐，有湯、前菜、主菜、甜品連野飲只需＄64，茶餐廳都無佢咁平！ 到訪嗰日係閒日，仲落住毛毛細雨，但安娜竟然係：爆場！！！仲要唔齊人唔入得⋯⋯ 無他，因為而家閒閒地食個扒餐，都要成百幾蚊，但安娜平均只係＄98蚊，識食既朋友當然黎呢度食啦。 入到去坐底，職員即送上餐牌，淨係本餐牌已經非常懷舊（其實好像沒有換過餐牌）： 雖然佢自稱出名菜式係咸豬手同牛柳，但我同老公叫左是日晚餐同雜扒餐各一份⋯⋯ 叫完野唔駛10秒，職員送上多士，效率快到⋯⋯ 再等左幾分鐘，餐湯黎啦～～羅宋湯係一般茶餐廳既味道，有少少辣，但驚喜係裡面有三大舊牛腩（請留意唔係肉碎黎架）！ 牛腩仲要煲得好淋，唔鞋，好有牛味，好味道～！ 跟著來既係是日晚餐既前菜 －－什肉沙律 其實係有幾片冷冰冰既肉：火腿、雞胸、牛脷，再加上薯仔沙津，味道一般啦 接著主菜來了： 雜扒份量大得驚人，有腸仔、豬扒、牛扒、雞全翼等，再配以鐵板上桌，抵食！ 不過老公就話豬扒好味過牛扒！ 我叫既主菜焗豬扒飯就賣相欠奉，皆因唔係原個焗盤上而係已經將個飯倒左落碟度： 好彩碟飯都幾好味道 －－熱辣辣的飯加埋甜甜的西汁（即係茶餐廳化既茄汁）再附上厚厚的豬扒，算是不錯的了～ 食完主菜再附上飲品及雪糕，先至收你64蚊，夫復何求呢？（還記得BLT嗰餐成五百蚊都唔知食左咩？ （詳情：https://blog.ulifestyle.com.hk/blogger/chopper/2016/02/伏已中-超級難食漢堡店blt-burger/） 需要坐得逼左少少，但場內氣氛頗熱鬧的，皆因人人都吃得好開心， 相信係因為食物味道不錯，份量又足，價值又平，同埋最最難得是職員的態度很親切，同埋好勤快！ 有時覺得，喺呢啲平民食堂食野，少了份壓力，多了份輕鬆～
