元朗近年多左啲高檔壽司店，如鮨文、壽司之神等， 呢類壽司店為港女至愛，因為用料高檔、裝潢高檔、味道高檔、埋單價錢更高檔..... 不過，我呢類已為人妻既"少婦"，始終都係鍾意抵食夾大件、行實際路線既田中多啲~!! 今次寫呢篇介紹時都有啲1516，因為呢間壽司店喺元朗係無人不識的，甚至區外人都會專乘來"朝聖"， 咁既然大家都識既食店，有咩好寫呢？ 就寫佢既轉變啦！因為原來佢已經陪伴左元朗人差不多成廿年了。 約廿年前，元朗壽司店(如明皇、嘩鬼、元綠)賣既壽司都是細細舊的，田中既出現，頓時令不少元朗友驚為天人~!! 還記得田中最初係開喺裕榮徑既，即係大坑渠B 仔涼粉附近，現址已改為大家都可能聽過既金田： 好多人都會特登來元朗食金田，不過大家又知唔知，田中喺比金田早幾年出現的？ 而曾幾何時，金田同田中兩間壽司店喺裕榮徑呢度鬥得你死我活？(因為兩間壽司店真係"眦鄰"架~!) 不過就我記憶所及，過常啲人都係因為田中無位，就會過左隔離金田食， 我個人就覺得，金田既壽司係長既，但田中既壽司係又厚又長既， 基於當時已很"師奶仔"既性格，所以我會死等田中， 等既時候做咩？咪過隔離B仔食住糖水先囉.... 幾年後，田中搬左去教育路，即係現時酒泉隔離： 猶記得嗰時田中搬左去教育路，舖位大左一倍，但人流都多左一倍，最終結局係引入沿用至今既"45 分鐘用餐時間制度"， 即係喺門口等緊位時已經要點好野食，入到去坐嗰時已經一枱都係野食，限時45分鐘立即開始(有點似食澳牛既感覺)。 而隔離間酒泉一般都係做田中做唔晒既生意，記得酒泉一開始竟然係買正常Size壽司，死得! 係年幾後直至而家先至係賣"元朗Size" 壽司.... 個人黎講呢間好食+抵食過金田！而食物種類亦比田中多，大家入開元朗又唔想等位的話不妨試下！(但必然無高檔壽司店咁"好味"架啦~) 另外，自田中入主教育路，麻布十番(現已結業)、一番等以"元朗Size" 壽司作招徠既店亦相繼出現： 不過，呢間試過一次唔會返轉頭，原因係啲壽司係巨大，但連舊壽司飯都痴左線咁巨大，點食？(上次去，食淨好多飯，折墜~) 經歷左約廿年，田中現落戶元朗大馬路，舖面再大左一倍，但人流又再多左： 皆因近排最明顯留意到，強國人都已經知道呢間野抵食，所以佢地喺附近藥房、"屈銀紙"、"價真散" 掃完貨， 都會黎田中食個飽！(有次仲聽到有個強國人問外賣有無冰，想拎過關:P) 唯一無變既就係佢既份量... 以前和朋友來呢度食，最喜歡點佢既 1.三文魚刺身、2.帶子壽司 同埋 3.關西牛肉飯， 到現在，份量依然，味道就有些少不同，主要係飯粒較以前酸，不過總體黎講都係咁大件新鮮好味道~! 必叫！三文魚刺身($69)，出面啲壽司店一定無呢個份量。 帶子壽司($25)，大大舊帶子刺身舖在適量既飯面上，依然非常抵食... 甜蝦($25)同玉子($18)壽司都不錯! 但當然帶子壽司性價比高啲啦~~ 好味到忍唔住叫埋帶子刺身($42)! 帶子味道非常香甜新鮮~~~ 以前無賣既三文魚腩刺身($82，其實有6片的但未影已食左:P)，重點都係大大件，油份較重，入口較甘香，但個人喜歡三文魚刺身($69) 的味道多啲~~ 而後面既關西牛肉飯($42)有好多牛肉，味道沒有變都是有濃濃的青椒味，配埋生雞蛋同醬汁撈埋，超好吃~~特別是食完壽司、刺身等生冷野再嚐一口暖暖的飯，正呀~~~~ 不過，唔講唔知，其實田中上年已經易左手了，而家個老闆再唔係以前嗰個唔多鐘意笑既老闆娘， 而師父大多都轉晒了(這可能是飯粒較以前酸的原因??)， 而原本既師父都另起爐灶，開了天壽： 我都去天壽食過，三文魚壽司既味道同田中有分別，就係飯粒無咁酸，但份量同田中一樣， 但略縑食物種類太少，有興趣尋回昔日田中味道既朋友，可以一試(較難搵所以附上地圖)： 所以話，田中壽司先之係元朗巨大壽司既始祖~ 多謝田中陪伴左元朗人成廿年，仲帶俾我地唔少美味開心既回憶 :)
