[深圳打卡Ep.2]酒店主題高空Cafe~ |北歐 | 復古 | 文青 |必定要收藏嘅小攻略~去之前一定要睇曬! 店名:Pétales 地址:石廈新天世紀商務大廈B座4802室 ------------------------------------- [交通] 係羅湖搭的士過去大約 $34 Rmb，車程15mins~如果有幾個fd去，除翻開都好平!! 開住百度地圖，咁就唔擔心司機會兜路~ (深圳打卡Ep.1 Uniform Cafe路程一樣，同一個位置)有興趣可以睇翻上篇介紹~一日去曬兩間!! ------------------------------------- [落車後點去] 係Starbucks隔離個棟大廈入去，係B座大堂搭電梯到5/F，之後轉B座高座電梯，上48/F，出電梯直行去走廊尾個間，睇清楚係4802室。 走廊頭個間並唔係，只係風格類似!!但啲佈置爭好遠㗎~唔好入錯!!! 靚女店主仲識講廣東話~好親切~佢都話好多人搞錯咗，去咗走廊頭個間。 ------------------------------------- [租借浴袍問題] 只要有消費，就可以免費租借 ------------------------------------- [衣著Tips] 建議著露膊衫同短褲去比較好!!因為著浴袍個陣唔會露到出嚟，又唔洗換衫，感覺比較衛生。 ------------------------------------- [影相小Tips] >主要分四個打卡區域< 第一個:大床~基本上淨係影床照都可以影好耐!!但床就得一張!!如果無咩人就當然可以慢慢影~但如果有人等緊，就最好影一陣，就讓下其他人，要做個有禮貌嘅人。 第二個:浴室~其實個浴缸都有排影，最好三、四點個陣影，有自然光點影都靚 第三個:餐枱區~如果要影相，就要視乎當時有無人食緊野啦~就下角度都可以影到靚相 第四個:乾花區~有好多唔同嘅乾花，超級文青風，而且唔洗等，所以臨走先影都ok 由1)大床>2)浴室>3)餐枱區>4)乾花區 排名按輪侯時間(長至短) ------------------------------------- [衛生程度] 可能大家都有個問題就係，啲浴袍會唔會洗，咁啱我去嘅時候就有個阿姨嚟放低啲洗乾淨咗嘅浴袍~不過始終就算日日洗，都難免會有啲污積。因為一日內可能都有好多人著過，所以大家都係唔好換衫，直接著上身會好啲，避免有直接皮膚接觸，咁就著得安心啲。 ------------------------------------- [食物質素] 我哋兩個人先叫咗個粟米湯配麵包~約$48 RMB。其實我覺得幾好飲，唔算好creamy，但味道幾好。 朱古力多士約$44 RMB。上枱嘅時候已經切好細細舊，方便你去食，好細心~ 仲有蜜桃冰茶約$46 RMB。甜度適中~ 總數$44+$48+$46=$138 價錢以餐廳為準，怕自己記錯。 ------------------------------------- 整體嚟講，人均$60-$70~食物還可以，仲可以打卡。又可以hea半日，佈置好有心機。香港好難有呢類型嘅Cafe，真心值得去，去chill下都開心。而且人流唔算多，基本上都可以慢慢影!! ------------------------------------- 如果想睇我繼續搵唔同嘅Cafe，記得like同share俾朋友睇啦。
