人生一定要去一次Grad Trip！！！！！！ 人生一定要去一次Grad Trip！！！！！！ 人生一定要去一次Grad Trip！！！！！！ 因為真係好重要 所以要講三次。 冇錯 本人都係應屆u grad 暫時去完3個grad trip都仲未開始搵工 諗住好好享受哂所有旅程先再算 好多人話愛情路上總會遇到幾個人渣 同樣地u grad路上總會遇到幾個老seafood 而seafoods最鍾意同fresh grad仔講 「工都未搵到去咩旅行呀~而家d九十後真係........(下刪500萬字廢話)」 真心 你地懂什麼。 讀書果陣明明成日叫我地好好利用空餘時間 喂 呢個係我地踏入社會最後嘅一個暑假 我地又憑咩唔好好善用呢? 去完首爾東京關西 雖然已經冇乜盤川喺手 但我依然覺得呢一切係值得嘅 趁去下個trip前有一個星期gap 我就歸納左人生一定要去一次Grad Tripの 五大原因出黎～ No.1 點得齊人數 大學生最幸福嘅莫過於彈性嘅時間表，尤其係考哂試等出gpa睇grad唔grad到果段時間，真係輕鬆到不能再輕鬆。呢d時間就最易點得齊人數，成班friend一齊去grad trip啦！眼見好多身邊朋友成日俾藉口自己，話下年番左工搵到錢先去咪一樣。蹝氣啦！到左明年今日，當大家番左工，夾時間放annual去旅行就會變左一個S級任務。到時真係唔慌齊到人！ No.2 時間就是本錢 旅行嘅最大目的係體驗當地文化，而體驗文化絕對唔係短短幾日可以做到嘅野。所以話去旅行嘅最佳時間一定係大學生grad果陣！岩岩grad又未番工，又有一筆part-time搵番黎嘅錢，有錢有時間，點解唔去一個10日以上嘅旅行，感受一下異國風情文化呢？拿，唔好又賴冇錢呀，窮有窮玩，豪有豪玩架啫！ No.3 了無牽掛～ 大學生係社會上最自由嘅人，既冇老闆嘅操控，亦冇工作上嘅壓力。當你番左工之後，連請個假都係一種壓力！就算俾你放到假去旅行，去到你分分鐘都仲要俾你老闆whatsapp轟炸！要玩，一定要趁呢段時間！所以話而家唔去，等幾時？ No.4 放鬆心情～為青春留下美好回憶 受左至少12年免費教育，你話完全唔攰唔辛苦都冇人信啦。讀書讀得咁辛苦，又點可以唔慰勞下自己喎？難得有時間就去個旅行，俾自己步入社會番工前take個break，輕鬆下啦！呢包你去左冇後悔！第時都一定會記得呢個trip有幾青春幾開心幾難忘！ No.5 英雄主義！！！ 呢個真係垃圾理由中嘅垃圾理由lol 不過如果朋友圈入面有你心儀對象嘅話，旅行就不失為一個表現自己嘅好機會喇：）先唔講表現自己，同心儀對象連續相處咁多日一定會認識對方更深，分分鍾更會日久生情添，咁就唔洗 A住grad啦～呵呵呵！ 喂 大學畢業一生人得一次 可以同一班friend齊齊整整, 無憂無慮咁玩嘅日子又有幾多剩呀? 好好珍惜啦Fresh Grad們
