栗子最鐘意就係帶雞翼周圍搵新嘢食。 最近,我哋去咗一間位於灣仔的拉麵店,主打雞白湯底拉麵。 如果唔係栗子帶雞翼去,雞翼一定唔會搵到呢一條街!(人肉GPS對一個路痴的重要性) 沿灣仔道往銅鑼灣方向直行至巴路士街口,轉右入去,大約行20秒望右, 就會見到巨型紅色燈籠。店門口有個大燈籠做裝飾,其實都好易認。 入到去,目測大約有15-20個座位,坐位空間尚算可以,唔會太迫。 放工非常肚餓嘅緣故,好快就喺點餐紙揀好了! 我倆本住一向嘅宗旨:咩都要試下嘅心態,分別點了至極雞白湯拉麵和魚介雞白湯拉麵、一客明太子雞翼($15/隻)同埋一客煎餃子($38/6隻),最後仲追加咗一碗白飯(一般香港人一定會覺得好奇怪) 至極雞白湯拉麵 $88 - 據說湯底係以雞慢火烹調10小時而成。拉麵一上枱當然要飲啖湯先,雞味十分濃厚,有糊口嘅感覺而且仲好滑溜。麵條方面,栗子揀咗幼麵同埋硬嘅麵質,不過麵條掛湯能力一般而且質感似係食緊即食麵(誇張咗),呢到要扣分。至於配料就比較特別,裡面有雞叉燒、溏心蛋1隻、炸蓮藕片同埋露筍。 雞叉燒相比起豬肉叉燒少咗份油膩感,好適合女仕們,不過略嫌「鞋」咗小小。溏心蛋同露筍都合格,而最有驚喜嘅竟然係炸蓮藕片!?切成薄薄嘅藕片炸咗之後外脆內爽甜,即使被麵湯浸淋咗都依然好味。 CC評分:3.9/5 魚介雞白湯拉麵 $82 - 以雞白湯做底再加入魚介粉而成,配料基本上同上述嗰碗一樣,只係少咗溏心蛋。呢個配搭令栗子諗番起東京一間以魚介雞湯沾麵成名嘅[麵屋一燈],當然拉麵和沾麵嘅湯頭唔可以相題並論,但可能係因為食過神級嘅一燈關係,栗子同雞翼對別家嘅魚介雞湯要求好高。言歸正傳,鳥華亭嘅魚介雞白湯拉麵真係有小許失望,唔知道師傅係唔係一時錯手落多咗魚介粉,令成個雞白湯頭都被魚介味蓋過了,浪費咗濃厚而有層次嘅湯底,有啲弄巧反拙。 CC評分:2.5/5 小食方面 煎餃子 $38 - 唔同一般日式煎餃店只供配餃子醋汁,呢到提供三款醬料(辣醬/咖哩醬/蔥),雞翼同栗子都推介中間嘅咖喱醬,配上juicy嘅餃子估唔到又幾夾。 CC評分:3.6/5 明太子雞翼 $15 - 一開二上碟,微辣的,但係乾身咗小小。 CC評分:3/5 最後食完碗麵栗子都唔夠飽,於是追加咗一碗白飯 $12, 倒落雞白湯當泡飯食, 一滴不漏盡情地食晒佢! CC評分:3.3/5 鳥華亭 地址:灣仔交加里22-30號華都樓地下15號舖