襯住放假,栗子又帶雞翼去食好野喇!我哋去咗一間位於荔枝角嘅日本料理食午餐。 由於我哋去到嘅時侯已經係三點喇,所以人客唔算多。 門口其實唔太起眼,入到去,風格係比較簡樸,感覺好似小店咁,唔會太商業化。 午餐Menu內,全部都係定食,價錢由$65 ~ $128 不等,價錢合理啊。 睇哂成個Menu,由於樣樣野都好想食嘅關係,我哋都係決定揀最最最足料果款,一於一次過滿足哂自己嘅食慾啦! 先講前菜。 有味噌湯同埋沙律,比起平時價錢相約嘅餐廳黎講,呢到嘅味噌湯味道更為濃郁。而沙律就係普通嘅生菜沙律,但用咗酸酸嘅沙律醋調味,味道適中,幾開胃! 就係呢個喇,極上雜錦魚生飯定食($128) 好。足。料。 有三文魚籽、海膽、拖羅、"魚立"魚、油金魚、玉子、帆立貝、赤身吞拿魚、三文魚同埋牡丹蝦!有成十款咁多。 所有刺身都好新鮮,拖羅都有2片啊!真係好好味。唯一比較遜色就係個玉子,乾身咗小小,食落有啲似蛋糕。 仲有餐飲添,呢個午餐真係大滿足嘅呢! 另外仲見到佢哋有一個特別的Menu,係一個吞拿魚宴($800/位),唔好俾個價錢嚇親先,再睇埋有咩食先,其實真係幾抵食!淨係睇頭四樣已經完全地俾佢吸引住。好可惜果一日雞翼同栗子都唔得閒,希望佢會再有下一次吞拿魚宴啦! CC評分:3.7/5 幸腹滿屋 荔枝角長沙灣道912-914號時信中心地下1號舖