一直都好想養貓，但因為屋企環境唔允許，所以都只係個諗法而且！ 不過有時想搵下貓貓玩，除左鋪頭養既貓之外， 貓貓CAFE都係個唔錯既流連地方，有得食又有得玩，一舉兩得！ 不過依家都多左好多貓貓CAFE既選擇， 而我同朋友就去左近期大熱既貓咪貓咪HOME。 貓咪貓咪HOME原來已經開左兩間，主要都係樓上CAFE， 而我地揀左近我地位置既果間，地方唔算太難搵，而且指示都幾清晰。 客人需要著襪、除鞋先可進場，而且CAFE有人數限制，唔想白行一敞可以先BOOK定位。 CAFE設有最低消費，不過計番埋都唔太貴， 平日去加六點前離座都只係$50咋，每人一個小食飲品都夠晒～ 而環境地方有別於平時既貓CAFE，佢地係用正常既枱櫈高度， 但貓貓們依然自如跑跳追逐，係枱櫈之間左右穿插，而我地都坐得舒服啲～ 貓CAFE當然唔少得佢地既貓家俬，後面仲擺放左個鋼琴，可惜冇學鋼琴冇得露兩手XD 鋼琴加貓咪，幻想都覺得舍意，氣氛好適合情侶／朋友聚會，大家一邊食野一邊玩貓貓～ 除左貓貓，大家都可以拎board games黎玩，同朋友玩左一兩場，都係貓星人吸引啲～ 貓星人們都好活潑，好樂意同你玩，有啲玩到攰就訓係同伴堆埋休息，見到個場面都好治癒！！ 係張大班椅到發現一堆懶洋洋既貓星人，估下依到有幾多隻貓星人？ 兩隻貓星人互相依偎既浪漫場面，認真夠SWEET！ 貓星人有特別訓教技巧。 仲有無限肉球任掂任影唔嬲，肉球我黎喇！！！ 唔好打擾朕休息。 喵⋯⋯ 依隻訓足全日呀！而且朋友發現，貓星人係會打鼻鼾@口@！！ 發現新大陸咁，影低又肥又懶既肥貓貓^3^ 貓咪貓咪HOME既貓貓大部分都係流浪貓同領養而黎， 有左依間CAFE，貓貓們有個屋企，又可以同大家玩， 店主實在太有心喇！愛貓人士都可以黎支持一下～ 每隻貓貓都會掛左個頸圈，而且掛住左佢地既名牌，細心留意一下就知道佢地既名～ 頸帶有分藍色同紅色，藍色則係男仔、紅色就係女仔，依個方法可以清晰展示比客人知呢～ 雞扒日式麻醬烏冬 對於胡麻醬加烏冬我係無法抗拒，碟上有可愛貓貓公仔， 胡麻醬偏水，烏冬同雞扒係熱，但胡麻醬就偏凍，有啲唔夾， 不過都接受到，雞扒就中規中矩，整體尚可。 蜜糖雞翼 有幾隻煎得比較窿，所以食落會有少少苦味， 而且一食就知係冰鮮雞，雞翼應該冇出水所以有陣味， 還可接受，味道中下，希望店員可以更加努力～ 法式芝士焗薯條 估唔到份量咁多！開頭以為只係一細份，嗌一個兩人食都好夠多， 半溶芝士加薯條既味道唔錯，口感則偏淋 同朋友分別嗌左荔枝梳打同提子梳打，荔枝個味唔係太出，而提子就比較入味， 不過飲耐左會只覺甜味，所以要係佢仲有氣前飲比較好 ＊餐廳評分＊ 味道：★★★☆☆ 環境：★★★★★ 服務：★★★★☆ 衛生：★★★☆☆ 抵食：★★★★★ 貓咪貓咪HOME 地址：旺角彌敦道566-568A號僑建大廈2樓 電話：6832 6990 評分詳情可按以下OpenRice連結喔! email: puishan123456@yahoo.com.hk ＊facebook＊OpenRice＊ ＊theztyle＊UBeauty＊she.com ＊beautyexchange＊Qooza Beauty＊iTrial＊ELLE＊glamaclub＊blogspot＊WeShare＊Pixnet＊WordPress＊Shewin＊ 以上全屬個人分享
