搵托兒服務其實一啲都唔難，可以返兩日又得，五日又得，唔返又得任君選擇。用google map 就一目了然，梗係揀最方便嗰間。(呢度應該冇話去邊間托兒所會入到啲咩名校呢支歌仔唱(幼稚園就唔包保啦)。政府批個資助金成七個禮拜都批唔出，佢批幾多錢俾你係視乎你有冇工做同埋一個禮拜返幾多日工。又係一大堆文件要填，之前仲要申請埋Medicare card，不斷打電話(每次閒閒地喺電話等半至－個鐘，打咗幾次，好浪費時間。都唔明點解唔可以咁嘥時間)終於等咗個幾兩個月仲要串錯人哋個名，email 佢又唔跟進，成個月都冇回音⋯⋯太過份！攞完張卡後就要去診所搵醫生核證香港嘅打針記錄，仲要喺醫生嗰度白等左一粒鐘都見唔到個醫生！啲香港嚟嘅醫生係咪咁衰㗎呢？知道我唔係來幫襯，照顧左啲幫襯嘅客人先？喂大佬，我啲家人都算睇咗你幾十年啦，唔係咁現實吖嘛！之後佢收咗啲打針記錄，咁樣又唔見咗一個禮拜。Waitlist 咗兩個月同完成千辛萬苦嘅政府津貼申請手續，同埋捉咗阿B去打腦膜炎針，終於可以返免費學啦。學校唔算好大，每日有唔同嘅主題如運動堂、日文堂。學校ABC都未教日文老師就已經教寫毛筆字。設施方面有indoor 同outdoor play area，有沙池有單車有滑梯。記得以前細個學校都有outdoor area 有沙池，但從未俾學生玩過都唔知係咪用嚟呃家長。上堂時有啲小朋友會唔着鞋周圍走，悉隨尊便。每日返學學校都會影五張以上嘅相俾家長留念，仲有詳細形容全日做過啲乜，唔使好似喺香港咁等成個月先得嗰幾張相。講到幼稚園同小學，其實我係BB出世幾個月已經幫佢輪定私校小學。其實唔知會唔會讀㗎，因為我哋都唔知幾時會搬去另外一個城市，不過都係比幾百蚊澳幣啫，當買個保險。點解唔讀公立學校？因為我覺得私校應該設施會好好多。睇吓英國啲公立學校同埋啲私立學校嘅設施你就知㗎啦。記住！攞得人哋嘅福利，就要對個國家有貢獻，千祈唔好做我哋最鄙視嘅蝗蟲！
