有讀過小弟之前寫嘅嘢就會知道我對啲移民廣告😒係以側目嘅態度看待。一味講個地方有幾好但又冇提供足夠當地知訊給你作出一個公平判斷。 馬拉名物: Ais Kacang (上), Kaya toast, Kopi C,滾水蛋(中) 同otak otak (下)近排睇到多個移民馬拉嘅介紹及已到當地居留人仕嘅報道只一律一面倒講晒好嗰方面,真令小弟倒抽一口涼氣。小弟眼見個現實係:因為回教係國教,女仕穿衣要小心點,唔係你想着低胸短裙就可以。雖然華人係唔會俾sharia police 拉,但喺一個思想較保守啲國家就唔係太好囉~就好似喺個跛嘅面前跳繩一樣咁挑釁。回教女子/男子如被發現有婚前性行為係要打滕嘅~打到屎忽開花嗰隻。小弟曾看過佢哋一份政府刊物,講述一個女仔俾打完滕贖罪後感覺良好⋯⋯讀後感係WTF是propaganda 來的嗎?CLS如不是bumi putera (馬拉語: 土著~通常係信奉回教 )福利待遇也不同。bumi 不用太辛苦勞碌就可以買樓買地安居樂業。識投胎永遠係贏在起跑線😁。雖然是多元種族,但邊個係一等公民就幾明顯啦。治安未必每個省都係咁好,要自己調查求證。私家車落車後要立即鎖門閂窗,驚俾人老粒。行街時手袋係唔可以向馬路嗰邊,驚比電單車搶手袋(特別係姓郭嗰個糖王嘅郷下會有呢個情況)。經過一些親身經歷後,小弟覺得嗰度有點兒似四大探長年代咁,駕車超速可以有方法搞掂。咩方法?唔使畫出腸吧!接唔接受到?喺西方社會長大嘅小弟就tak boleh tahan (馬拉語:頂唔順)。政治穩定?你諗吓個反對派領袖俾人告雞姦就知乜料。點解好似熟口熟面咁嘅?當地土著告訴我佢地心知xx滲透嚴重,政黨內又有好多愛國愛黨之權貴幫手...香港嗰三個喜歡飲湯嘅姊妹花就係例子啦。唔識馬拉話都幾麻煩,尤其遇到啲同政府部門有關嘅嘢(雖然國民啲英文程度係好高)。其實馬拉文唔算難學,所以花一年半載學應該不是問題。當年小弟只係買咗本lonely planet 出嘅Malay phrase book,之後同土著溝通都學到少少番嚟。人工超低,所以好多國民會去星加坡打工。如果去生活嘅話就唔好打工。如果做老細請咗土著伙記,佢哋每日返工時間去拜幾次神咁你又會有咩感覺呢? 其他生活習慣方面:去商場啲廁所或公廁成日個地下都係濕立立,皆因回教人仕會用水槍冲洗pat pat,唔可以只用廁紙。佢哋個教派好似有呢啲咁嘅規條要遵守。所以喺嗰度係冇須在要著靚鞋,踢拖就得。睇真啲呢個地方真係未必個個人會受落,不過如果你係去嫁入豪門、過去嘆世界或攞住一大嚿錢去買島自己起屋退休就令作別論。小弟十年前睇過買島嘅資料,一個島嘅價錢都唔算係好貴,用一個yoho town 嘅三百尺單位都可能買到,但宜家咩價位就唔知啦。但係買發電機搵水源、點排污又係另一堆要解決嘅問題。比較適合香港人住嘅地方可能係檳城,因為華人係主要嘅居民,生活習性比較相同及同聲同氣。但退休會適合啲。如果一心諗住去打工又冇乜積蓄,人工咁低真係唔知會有甚麼quality of life。醫療方面,有些星加坡人會特登上馬六甲去睇醫生做體檢,因為平啲同較近。馬拉好就好在冇乜天災,生活指數又低咁囉。其實走佬去泰國唔會好啲咩?馬來西亞人最喜歡嘅移民國家喺邊度?咪就係新加坡同澳洲囉。