最近有睇過英文台講述好多嗰英國嘅academy 已經進步咗好多，設施都好現代化。小弟年紀有一把，距離中學年代已有一段時間，資訊應該已經out咗但可以分享吓當年小弟讀過三個月嘅state school 夠竟係咩嘅一回事。 [Upton upon Severn]嗰間學校係中介公司介紹，我啊媽揀呢間學因為佢有少少似國際學校嘅形式，收本地、歐洲、澳門(葡國)及英屬香港學生之外，學校聲稱每年也有一兩個學生入到牛劍。當然香港同澳門嘅學生就群埋一堆，都其實冇乜機會可以講英文。而某部份英國本土學生就有啲歧視- 因為可能沒見過世面吧！宿舍浴室啲水一係過熱一係過凍，好似熱水永遠都溝唔到凍水咁。每日仲要打掃房間、打掃宿舍每一個地方？！究竟我去做工人定讀書？當時我腦海只想到一齣英國名著Oliver Twist 。上課時啲學生頑劣到老師只可以不停鬧人無法正常說話，莫講話授課。喺香港啲頑劣學生最多咪自己坐喺度做自己嘢游魂四海，但嗰間學校嘅曳學生可以令到全班大騷亂，捐落枱底俾老師捉上嚟時撞到老師滴晒血咁走出課室。仲見到校園裏有學生隨便在草叢拋棄針筒等。喺呢個咁恐怖嘅學習環境之下只可以一個字——閃。新嘅學校梗係靠自己搵啦，仲會再俾啲中介老點咩。嗰陣時識嗰啲香港人之後都冇再聯絡。隔了多年後從一個朋友口中得知當時嗰間學校我識得最乖最純品嘅女仔喺倫敦玩到創晒讀唔成書，冇讀大學就離開咗英國返香港。其實喺英國真係好多讀唔成書嘅香港人喺度蹉跎歲月。大學年代仲誇張，聽過有啲學生一年冇返學、逢二進一、欠下幾十萬磅賭債、欠下賭債後用自己一年學費填數兼欺騙家人要留班但仲要俾學費等。呢個地方係好睇你自己有冇自律性去學習及有空時不斷溫故而知新，而冇人管到你嘅時候就要靠自己。所謂近朱者赤，讀書環境、其他同學仔嘅學習態度及家庭背景都係好重要。我相信香港嘅虎爸虎媽對呢點一啲都唔陌生。建議自己親自同小朋友在上課期間親自過去探訪吓感受吓先至好報名入讀。入讀後見到唔對路就立即走人，以免耽誤時間耽誤學業。詞彙:State School = 公立學校public school / independent school /private school = 私校 (其實佢哋有少少分別，但小弟都唔係好分得清，總之係私校)
