上次講到新加坡人喜歡移民澳洲。新加坡人精甩辮，貴為佢哋移民首選嘅地點，好處自然多: 天氣好，環境靚，污染低；多元文化社會，宣揚人人平等及重視土著福利(可能要為過去白澳洲主義贖罪？人哋政府並沒有否認及推卸責任且勇於承擔；有大將之風，和某國很不同)；有言論自由；澳洲人冇英國人咁拘謹造作虛假；買普通BB用品平香港好多(當然同淘寶未必有得比，但小弟冇淘寶呢個習慣)。如果買歐美名牌BB產品都係平過香港好多。澳洲測試BB產品係好嚴格嘅-尤其是BB汽車座椅，而香港只係倚賴歐盟測試；整體上政府提供的免費教育都唔錯。對比英國嗰啲state school 可以好恐怖-睇吓你好唔好彩啦(小弟讀過三個月，下個post會講吓)；公立醫院醫療同私營醫院差距不太遠。不像英國NHS咁睇個醫生都要等成個禮拜。所以小弟大學時代只睇過NHS一次，多數自己食藥搞掂；大學學費較便宜。壞處：如果唔係城市住嘅話冇車、唔識揸車應該生存唔到；去偏遠地區時要清楚知道下個油站喺邊，如果唔係真係可以渴死異鄉；澳洲大學喺世界排名不是太出衆，冇英美名牌大學咁受雇主趨之若鶩；稅高，難儲錢；境內旅遊分分鐘貴過去外國(如峇里島、泰國及斐濟)。要俾一千幾百萬嗰啲投資移民方法唔喺度講啦。小弟呢啲打工仔如果要移民梗係用最平嘅方法去。有專業技能申請技術移民唔係冇可能，但由於申請人數眾多，要與其他申請者競爭，獲得65分的基本資格或未足以申請成功。聽說要95-100分才十拿九穩；嗰年名額派曬你嘅申請費用就凍過水。如果有以下條件就可以加得最多分:喺澳洲讀過大學/做過嘢有博士學位伴侶係澳洲人年紀不是太大（最多分喺25-32歲) [Cape Byron lighthouse @Byron bay]冇乜以上加分條件的話，可以申請另一條較低風險會被拒絕但批核時間最長又係最貴嘅海外伴侶移民(309/100)。網上啲blog 較少講關於呢款簽證，等小弟講吓少少資料俾大家:據澳洲人口研究所的數據2017- 18財政年間，獲得澳洲配偶簽證人數最多的前五名國家有：中國1624名；越南982名；泰國592名；印度526名；英國336名。當然大前提係有個澳洲籍伴侶(同性異性皆可)。結婚超過三年或結婚有小朋友超過兩年，同埋俾足夠證據你哋嘅婚姻係會長久發展落去及真實就可以申請。現時批核時間需要18-24個月。申請時，申請人要提供真實而且可驗證的資料；一旦向移民局提供誤導性、虛假資訊、文件不足及疑似假結婚就會被拒絕申請。假結婚可以被判處10年監禁及被驅逐出境。 [Hunter Valley]申請嘅時候最好有至少兩個當地親戚朋友(最好是專業人仕)推薦且聲明識得你及講述你哋點樣結識。提名人(申請人伴侶)更要經過澳洲的品格審查程序(類似喺香港攞良民證)，如果提名人不是在澳洲居住也要提供居住地嘅良民證。今年開始申請人更要考IELTS。其實都係一件好事；如果佢老公係啲虐妻變態佬，去到又冇親戚朋友又唔識英文基本上係求救無門，會生不如死。此要求也可以確保申請人及其伴侶都可以為澳洲作出貢獻，而不是嚟白食白住攞着數。正常情況交埋良民證後大概一個月就會批出簽證。其實識英文喺唔須要搵移民中介公司申請，自己搞掂仲快捷清楚兼慳唔少。
