日期：2021年9月4日 謝偉銓話業界使用無人機進行土地測量及繪製地圖、為建築物進行驗收、維修保養及3D掃描等，至於目前嘅無人機大致上可分為7公斤以下嘅甲類，同7至25公斤嘅乙類，而業界多數使用後者並按舊條例嘅要求辦事，譬如購買保險，以及香港測量師學會提供無人機操作課程以及資格評核。新例細節欠奉 如何銜接成疑雖則話新條例通過之後將會有過渡期同適應期，預料最快一年後先至落實，之不過新條例目前未有細節，到底新條例實施後，會唔會所有嘢都從頭嚟過？而過往測量師學會提供嘅相關培訓同資格，新條例之下又會唔會得到認可呢？佢話希望唔使讀完測量師學會嘅中學班，因為新條例實施就要讀埋政府嘅幼稚園班啦！所以日前佢同民航處見面，睇吓新條例喺執行方面可以點樣跟進。至於政府代表嘅回應，就話立法為確保無人機操作唔會危害市民嘅安全同私隱，對於業界最關注嘅審批及過渡安排，政府承諾新制度只會比現行做法更方便同寬鬆喎。總之都係未有具體內容嘅官腔，謝偉銓話惟有繼續跟進啦。講起無人機所涉及嘅私隱問題，區議員張美雄就話近年佢都收到好多宗有關無人機侵犯私隱嘅投訴。其中有一宗令佢印象深刻嘅投訴，係有一架無人機飛上30幾樓，並喺一個露台外懸空停留，正喺露台晾衫嘅女住戶感到私隱被侵犯，雖向警方求助，但礙於追查困難，況且誰人操作亦難以舉證，結果投訴都係不了了之。註冊登記制度 料減侵犯私隱張美雄認為如果實施無人機註冊或登記制度，或購買無人機須提供個人資料嘅話，相信可以增加阻嚇力，減少侵犯私隱嘅情況出現，但如何確保新制度唔會阻礙無人機發展，法例上嘅細節上真係要仔細研究。另外佢又特別提到，現時250克至7公斤嘅無人機係主流，希望當局限制不要太大，包括高度限制要放寬啲，保費唔好太高咁話。有關網址：https://orientaldaily.on.cc/content/%E8%A6%81%E8%81%9E%E6%B8%AF%E8%81%9E/odn-20210904-0904_00176_401/%E6%94%BF%E6%83%85%EF%BC%9A%E8%A6%8F%E7%AE%A1%E7%84%A1%E4%BA%BA%E6%A9%9F--%E6%81%90%E9%A0%88%E5%86%8D%E5%9F%B9%E8%A8%93--%E8%AC%9D%E5%81%89%E9%8A%93%E6%80%95%E8%AE%80%E5%B9%BC%E5%9C%92%E7%8F%AD
