前星期大帽山一日遊,晏晝先去川龍村端記茶樓嘆咗一盅兩件,呢度係自助形式嘅茶居 由沖茶到攞嘢食都係自己一手一腳攪,至於食物味道,就見人見智了!雖然比起一般去開嘅酒樓味道係爭d,但係呢度食得嘢,味道真係其次,係食特色囉,因為唔係對住冷氣食嘢,而係對住自然環境食嘢,仲有勁多雀聲! 嗰日叫咗少食啊!但估唔到最有驚喜係蝦餃,雖然皮厚,但好滑,裡面亦好足料,有成3隻蝦,仲勁彈牙。 D點心勁傳統啊!大包好足料,雞扎好傳統,竟然仲有豬肚,好耐冇食過有豬肚嘅雞扎!馬拉糕軟熟!唔錯! 郊外油菜幾鮮甜 山水荳腐花好滑! 推介食物:雞球大飽、雞紥、蝦餃、山水荳腐花 最後9個食物埋單計埋連埋2位茶位$186,唔算貴,因為未去過呢d咁有風味嘅酒樓飲茶!同埋係呢度飲茶記住慢慢嘆,因為雖然發現佢初初食物唔算多,但間唔中會有新嘢推出,老闆就會叫咪通知大家有咩新嘢食,d人就會衝落去攞食物,好鬼攪笑! 食飽飽後,仲可以係川龍村度散咗一陣間步,吸吓新鮮空氣,之後再搭51巴士遊大帽山至石崗,睇吓沿途風景,都幾唔錯!或者去大帽山郊野公園行吓山都得!