其實我自己不嬲都對香薰有少少興趣同研究的，因為一來鐘意香薰的味道，二來因為我本身自己有養狗，有時D親戚朋友上嚟前，我怕屋企一大陣狗味，我都會點D薰衣草香薰，可以大家作RELAX吓用同辟緊d狗味！ 但大家唔講唔知，原來有些天然的香薰，係有殺害蚊蟲的功效的！係我腦海中，有薰衣草，覺得佢係一支萬能的香薰油，可以用嚟作RELAX香氣又得，驅蚊又得！ 上星期得到WeShare.hk的邀請，可以出席到「蚊蟲怕怕香薰噴霧」DIY 工作坊，每人可制作一支天然香薰蚊怕水同蚊叮虫咬止痕膏，而最抵讚之處係其實今日的工作坊，如有3歲以上的小朋友，可以帶同佢地一齊出席的，但好可惜，我冇，哈哈！ 一去到，已有數位家長帶同小朋友一同出席 而WeShare.hk亦都好細心咁為我們預備了茶點！真貼心！ 其實我都好肚餓，因為那天不用上班，我瞓醒已趕不及待趕去，所以我都整番件旦糕先，好味道！ 工作坊倘未開始，所以周圍影吓相先，幅畫畫得好靚，所以點都要自拍一下先！ 過多一陣，工作坊就正式開始啦！首先是WeShare.hk靚女工作人員介紹一下WeShare.hk先，然後再由今日靚靚導師Kylie為我們作教學及講解，唔講唔知，原來Kylie老師，未做香薰治療師/導師前，係一位小學老師嚟ga！而佢而家已經考獲了"國際認可IFPA註冊專業香薰治療師"及"導師"牌，所以而家都係老師，不過係教成年人！ 首先問大家一個問題，大家知唔知點解，小朋友比老人家，d蚊係鐘意咬小朋友多於老人家呢？答案當然並不是小朋友d肉較嫩，所以d蚊鐘意咬佢地多d啦！真係係因為蚊只會feel到邊個熱d，就咬邊個，小朋友的體温，一定係較老人家為高，所以d蚊一定揀咬小朋友先！ 之後Kylie老師就講解吓，市面上蚊怕水的成份，原來佢地多數，都係人造出嚟的香味，所以先keep到咁多小時，同埋有d更有DEET成份的！ 大家可能唔知DEET係d咩呢？！佢中文學名叫"避蚊胺"是一種有害的化學物質，含神經毒素，屬油溶性，可透過皮膚滲入人體，構成急性中毒。美國兒科學會建議，兒童應使用DEET含量低於10%以下的防蚊用品。加拿大健康局更警告，6個月以下嬰兒絶不能使用含DEET成份的產品，2歲以下幼兒，每日只能塗DEET低於10%的產品一次，同時亦避免長期使用。可想而知有DEET成份的驅蚊產品，對人類係有幾危險！所以大家盡可能真係唔好用DEET成份的驅蚊產品了！ 之後就入正題了，先講解一下，香薰的用處及可以用嚟驅蚊的天然香薰有邊幾種，第一件事，老師就教咗我地點樣睇天然香薰！通常天然香薰，佢一定會寫100% pure essential oil / true essential oil同佢地有希臘文的學名的，如薰衣草就除咗LAVENDER外，仲有個LAVANDULA ANGUSTIFOLIA的希臘文字，同埋真正的天然香薰油，每一次聞，個氣味都會變化好大，可能每一次個味都會唔同，咁就多數係代表真係堅的天然香薰油了！ 之後就講吓，驅蚊的天然香薰油，有幾多種啦： 1. 最大路的，當然係薰衣草 (LAVENDER - LAVANDULA ANGUSTIFOLIA) 最温和的驅蚊劑，緩和被叮咬後的疼痛，消毒傷口，亦能淨化空氣，小孩可使用。大人的話，可直接將純精油搽在皮膚上。 但不建議在懷孕初期(三個月內)使用，患有血壓低的患者，亦不適宜使用，因有可能令血壓更低。 2. 天竺葵 (GERANIUM - PELARGONIUM GRAVEOLENS) 原來天竺葵，其中一個品種，係我們隨處可以買到的植物，嗰種植物就係叫驅蚊草啦。新鮮的天竺葵具驅虫特性，精油也有此特性，更具抗紅腫發炎特性，可鎮靜皮膚，促進傷口癒合。但此精油，驅蚊效能也是最低的！小孩可使用。 3. 藍膠尤加利 (EUCALYPTUS BLUE GUM - EUCALYPTUS GLOBULUS) 有驅蚊、驅虫的功效，亦能除狗蚤，具淨化空氣，殺菌及抗塵蟎的作用，亦對呼吸系列好的一種香薰油，但小孩不適用。 4. 檸檬尤加利 (EUCALYPTUS CITRODORA - EUCALYPTUS CITRODORA) 有驅蚊、驅虫的功效，性質較藍膠尤加利温和，所以較適合小孩使用 5. 檸檬香茅 (LEMONGRASS - CYMBOPOGON CITRATUS) 使人有激勵、恢復精力的功效，具驅蚊蟲的效果，但由於含豐富的檸檬醛(制其他香薰油的其中一種主要原料)，使用的稀釋比例不宜過高，濕疹皮膚亦避免使用，所以不適合小孩使用。其實檸檬香茅個味係較為fresh的，如果想要甜d味的，可揀一隻叫MAY CHANG的，個味同檸檬香茅差不多，但就比較甜d。 6. 香茅 (CITRONELLA - CYMBOPOGON NARDUS) 香薰治療中較少使用，但驅蚊虫效果理想，不會刺激皮膚，適合用來製作驅蚊水，小孩可使用。 綜合以上6種驅蚊香薰油，小孩只可使用：香茅、檸檬尤加利、天竺葵及薰衣草作驅蚊水之用，大人呢，如果冇濕疹的話，以上6種香薰油，都可用來作驅蚊水之用。 Kylie老師，續一講解時，仲每一隻味的香薰油，倒出嚟比我地聞 講解完，就動手做我們自己喜歡的驅蚊水了！ Kylie老師話，制驅蚊水最主要的材料，是蒸餾水(建議用蒸餾水或純提煉出來的花水，但不建議用礦泉水)，之後再揀3隻自己想要的有效驅蚊成份的香薰油，之後再加埋溶解劑(係等d香薰油，可以溶於水內)，就完成gala，非常簡單！ 首先倒入半支蒸餾水 然後揀3隻自己鐘意的有驅蚊效果的香薰油，每款3滴，小孩則每款2滴。 之後再加埋12滴，小孩則9滴，溶解劑，後再倒入蒸餾水至8成滿，搖勻即可。 而我的驅蚊水，我想驅蚊效果勁d，所以揀了薰衣草、藍膠尤加利同檸檬香茅 Kylie老師仲話，由於呢d係天然香薰油驅蚊水，所以味道係散得比市面上嗰d蚊怕水快，所以建議如外出的話，要每小時補一次，同埋如果孕婦、嬰幼兒、有濕疹及皮膚敏感者，則要小心使用，不建議直接噴在皮膚上，可噴在衣物上。同埋我都問過Kylie老師可唔可以噴係狗身上，佢話可以，但要肯定佢地唔會 到。 之後就制作埋蚊叮虫咬止痕膏，會多咗一隻新的精油就係茶樹油啦！ 茶樹油 (TEA TREE - MELALEUCA ALTERNIFOLIA) 強效抗菌，改善傷口感染，可適用於灼傷、瘡、蚊叮虫咬、曬傷止搔癢效果佳，大人可直接滴在皮膚上，由於特質温和，小孩也適合使用。 制蚊叮虫咬止痕膏材料：無味蘆薈凝膠(約10ml)、薰衣草精油(2滴、小孩1滴)，茶樹精油(2滴、小孩1滴) 攪勻變乳白色即可 小朋友們亦十分認真地制作自己的作品 我們的完成品，同埋我今日識咗呢位小朋友，佢好可愛同好攪笑，每次遞d香薰油比佢聞，佢都會話好香的！ 後記：當天上完 WeShare.hk @「蚊蟲怕怕香薰噴霧」DIY 工作坊後，第一件事返去睇吓之前係d大型連鎖店買的蚊水同蚊膏，頂，真係有DEET成份的！雖然我唔係會勁比蚊咬嗰隻，但夏天出外戶外活動時，少不免會噴d蚊怕水，今日學識咗自制天然香薰驅蚊水後，由今個夏天開始，就唔駛再用有DEET成份的蚊怕水了！同埋我再睇吓Kylie老師教我睇的香薰油後，返到屋企再睇吓我支玫瑰同薰衣草香薰油，睇吓係咪堅pure essential先，好彩係，薰衣草嗰支有LAVANDULA ANGUSTIFOLIA呢個字，而玫瑰嗰支則寫住100% pure essential，呢d咪叫做學以致用囉！上完堂後，真係對香薰油了解更加多！謝謝WeShare.hk同埋Kylie老師的詳細講解！
