01 Oct 2015… St. Petersburg > Moscow 今日係喺聖彼得堡嘅最後一日, 今晚我地就會飛返過莫斯科作最後衝刺~~ 係我地住嘅地方附近是但入咗一間餐廳, 食咗個唔錯嘅早餐, 之後我地就起程去斯莫爾尼修道院 (Смольный монастырь), 因為今日只係剩返喱一個大景點, 所以我哋都係選擇慢慢行過去, 其實我地都真係幾行得, 哈哈..... 我諗真係有行咗差唔多 50-60分鐘~~ 不過邊行邊望下嘢其實都唔辛苦嘅~~ 點擊圖片放大 +7 一去到修道院, 已經見到最主要嘅大教堂維修緊，外牆俾好多嘢圍住, 入面都冇得參觀.... 有冇咁黑仔先...?!.. 尋日隻艦又駛左去維修, 今日又維修..... 唉.... 我地淨係可以喺入面望一望, 同埋去咗個廁所咋..... 點擊圖片放大 +10 之後我地只可以喺修道院周圍閒逛一下, 成組建築物主要用白色同粉藍色, 其實都幾靚架~~ 點擊圖片放大 +7 參觀完修道院, 我地就行返出市中心去搵郵局寄 postcard, 同埋Lala 要幫人買Starbucks 俄羅斯版嘅杯, 完成晒所有 task 之後, 我地就返咗去屋企附近嘅一間餐廳, 叫咗啲嘢食同嘢飲 hea 到夠鐘先走人~~ 點擊圖片放大 +10 拎返行李之後, 今次當然係叫 apartment 幫我地搵車去機場啦~~ 我地搭 8pm 機返去 Moscow, 但今次係另一個機場, Domodedovo Moscow Airport (DME), 本身應該 9:30pm 抵達嘅, 但有 D delay, 到步已經 10 點幾喇~~ 今晚都係住返我地之前住嗰間五星級的家, 今朝我地已經 WhatsApp 咗 apartment 幫我地 book 車, 去到大堂搵唔到司機, 於是 WhatsApp 同 apartment 溝通咗陣, 搵咗陣終於見到佢喇~~ 點擊圖片放大 +3 返到 Moscow 心情特別好, 仲要返去我地鍾意到爆嘅 apartment, 仲係同一個房 tim~~ 今晚係成個 trip 嘅最後一個晚上, 聽日仲有半日, 之後就返香港喇~~ 所以我地要做埋最重要嘅嘢先, 就係攤晒所有戰利品出黎影大合照喇~~ wahahhaaaa 興奮過後.... 當然就要執返好晒 D 嘢先瞓得啦.....
