29 Sep 2015… Wrocław > St. Petersburg 瞓咗幾個鐘, 託 Apartment 幫我地 call 咗的士, 零晨 3:30am 左右就出發去機場~~ 我地搭 6:15am 機, 先搭個幾鐘機去 Copenhagen, 等兩個幾鐘, 再轉機飛唔駛兩個鐘去 St Petersburg~~ 到達 St Petersburg 差唔多晏晝一點, 我地見之前喺 Moscow 搭的士唔算貴, 估計喱度應該差唔多價錢, 我地就決定搭的士去住嘅地方~~ 一出到機場大堂, 就有好多人走埋黎問你要唔要 Taxi, 我地問其中一個司機去我地住嘅地方幾錢, 佢話 RUB2000 (大概HKD230), 出發前 search 過, 如果搭公共交通工具, 要搭巴士轉 metro 再轉線再行先到, 差唔多要一個鐘~~ 搭的士舒舒服服又快 D, 除返開都唔算好貴, 於是我地就跟咗個司機出去喇~~ 出到機場, 個男人一路帶我地行, 過晒出面嘅的士站, 帶咗我地去機場對面嘅一個停車場, 我地一路行一路覺得好似有 D 奇怪.... 到咗停車場入面有好多其他估計係司機嘅人... 個男人帶我地去到一架車, 並唔係的士嘅外貌, 但入面都有一個好似咪錶咁嘅物體, 我地估計應該都係 D 白牌車, 個男人幫我地放好行李喺車尾箱, 之後就出發喇~~ 一路行我都有開住個 Google Map 睇吓條路係唔係去緊酒店, 路程果然唔近, 都成 45mins 先到~~ 喺我地諗住落車嘅時候, 司機同我地講要 RUB6000.... FXXK!! 我地梗係死都同佢理論啦!! 我地話明明上車前係講RUB2000, 佢夠膽死話 RUB2000 係 per head, 佢唔好去搶?! 我地堅持話唔會俾, 個男人話如果我地唔俾就車返我地去機場, 同佢個 company 講, 我開咗車門, 是但問咗個男途人由機場搭的士黎喱度要幾錢, 佢都係話 around 二千幾, 個司機完全唔理, 一路係咁話要車返我地去機場, 我就一路開住車門叫佢地死都唔好比佢走, 因為我地 D 行李仲喺車尾箱, 我嘗試走落去我地住嘅地方搵人幫我地, 點知唯一識英文嗰個負責人唔喺度, 另外有個唔識英文嘅員工嬸嬸, 但我都叫咗佢跟我出去諗住幫下手啦... 佢出到黎只係企咗喺度一臉無奈.... 中間我地有諗過報警嘅... 但可能受到之前 D 人講嘅影響, 我地硬係覺得報警都未必有用.... 後來我地落晒車話要拎返 D 行李, 司機仍然唔肯俾我地走, Lala 叫司機打俾佢公司, 電話接通後 Lala 就拎住個電話同佢理論, 話如果係 RUB2000 per head 咁點解我地唔一人搭一架車?! 爭拗咗一輪, 最終我地話最多只會俾 RUB4000, 結果總算 settle 咗.... 但真係好嬲!! 估唔到一到步聖彼得堡就遇上 ”黑的” ..... 後尾我地見到識講英文嘅職員, 同佢傾返喱件事, 佢叫我地千祈唔好自己喺街截的士, 佢話如果有需要, 一定要叫佢幫我地 call 車, 因為試過有遊客自己喺街截車返 apartment 都係俾人屈$.... OMG....!! 終於都可以去check-in, 我地住嘅地方叫做 Kaleydoskop Design, 似係將一個大單位間做幾個細房嘅地方, 我地間三人房雖然好細, 不過設備齊全~~ 點擊圖片放大 +7 抖咗陣我地就拎個地圖同行程出黎研究下今日去邊度先好~~ 可能因為頭先 ”黑的事件” 嘅關係, 令到大家對呢個地方嘅感覺都唔係咁好.... 唉.... 收拾心情出發, 首先我地行返出 Nevsky Avenue (涅瓦大道), 果然係聖彼得堡嘅主要大街，喱度人來人往, 兩邊有好多唔同嘅店舖同建築物，中間係一條好闊嘅馬路，時不時會見到大嘅雕像~~ 點擊圖片放大 +7 成日都冇乜食過嘢, 我地求其入咗一間餐廳食咗少少野醫肚, 然後繼續向滴血救世主教堂 (Храм Воскресения Христова на Крови) 方向前進, 離遠見到教堂喺一條河嘅盡頭, 夾埋成個景真係好靚呀~~ 點擊圖片放大 +16 終於行到教堂, 即刻買飛入去參觀, 嘩~~~ 原來入面真係好靚呀!!! 同歐洲嘅教堂好唔同, 金碧輝煌, 周圍都係彩色嘅壁畫, 牆身、柱、天花板、就連尖頂位都有, 真係齋黎睇喱間滴血教堂都已經值回票價呀!! 點擊圖片放大 +19 參觀完教堂, 我地繼續向冬宮方向行, 沿途見到有人喺街頭賣藝, 有坐喺地下玩手碟鼓嘅青年, 又有企到好高吹喇叭嘅叔叔~~ 又喺街中間無啦啦見到有塊搖搖板, 童心未泯嘅我地唔理世人嘅目光, 三條友輪流玩到不知幾歡欣, 其實開心真係可以好簡單架咋~~ 點擊圖片放大 +8 去到冬宮已經開始天黑喇, 咁啱俾我地睇住佢著燈, 著咗燈嘅冬宮好似仲靚 D tim~~ 點擊圖片放大 +5 今日要去嘅景點大致上完成，我地見喱個地方好似比較雜, 可能因為被晏晝 ”黑的事件” 影響.... 我地都唔敢咁夜返屋企~~ 我地沿住大街行返頭先條路慢慢返去~~ 中途行過一間好大嘅店, 個 display 超靚, 入面賣好多甜點, 蛋糕, 糖... etc... 仲有地方俾人坐低飲嘢食cake 架~~ 點擊圖片放大 +15 喺我地返屋企嘅途中... 又發生咗另一單驚嚇事件..... 我地行到某個位發覺有三個望落似壞人嘅男子好似跟住我地咁.... 我地特登想避開佢地過咗馬路先, 佢地又過馬路... 係咁望住我地.... 我地已經提高警覺特登快行, 佢地又跟我地快行, 過咗馬路之後 Lala 比我同 Onlee 行得快, 之後其中一個 ”爛面佬” 行得勁近 Lala, 我地即刻大聲叫 Lala 話：「佢喺你後面! 」, 之後 Lala 勁驚即刻行返過我地度, 我地即刻黐返埋一齊行喺佢地後面, 佢地仲要喺我地隔離唔知講乜春.... 堅驚呀痴線! ! 我地本身應該直行, 但為咗避佢地, 我地轉咗入一條街, 企咗陣見佢地真係走咗先再行..... 其實嗰陣仲成條街人來人往, 但嗰幾條友個樣堅似壞人, 又有 D 似醉酒佬咁..... 最驚係跟住我地丫嘛..... 真係嚇死.... 我地幾乎要跑返屋企咁滯.... 唉.... 今日一到步就接連兩單衰嘢..... 好難令我地覺得喱個城市安全..... 唯有之後兩日都早出早歸啦...... 今晚都係喺屋企食麵算喇...... 慘慘.......
