22 Sep 2013... 今朝我地喺酒店我食咗前日買嘅 MAMA 青咖哩柸麵做早餐, 之後就出發去”翟道翟” market, 而家去翟道翟非常方便, 只要搭 BTS 去到 Mo Chit 站, 行條天橋, 基本上跟住人羣行就已經知喺邊~~ 去到翟道翟, 首先拎張 market 嘅地圖會方便好多, 因為喱度實在太大, 如果漫無目的咁行真係行一日都行唔晒... market 有分區, 每個區賣唔同嘅嘢, 只要睇住地圖搵你想去嘅區, 就唔駛嘥時間行 D 你無興趣嘅區域~~ 點擊圖片放大 +2 我地第一個目標係買人字拖, 喱間人字拖係非常好著, 又輕又 “come” 著, 仲要好多 pattern 同顏色揀 tim~~ 次次 Lala 去 Bangkok 都會買好多返黎, 今次我自己黎到, 當然要入返 D 貨啦!! 我地喺間舖都玩咗有一陣子... 一人買咗一堆... hahaaa~~ 之後我地就喺賣衫嘅區域 hea 行~~ 喱度比起 7 年前嘅環境改善咗好多, 我記得嗰陣時 D 巷係超熱同超焗... 行一陣會頂唔順行返出大街抖下氣... 今次黎雖然天氣都係好熱, 但係起碼唔覺得焗~~ 有一邊仲係新架 tim~~ 賣嘅衫質素都 D 架~~ 喺入面巷行到咗上下, 我地出返去大街食咗出名嘅椰子雪糕, Lala 仲飲咗泰式奶茶~~ 跟住是但搵咗檔食 lunch~~ 食咗青木瓜絲沙律、雞脾同一人一碗粉~~ 點擊圖片放大 +7 食飽飽繼續作戰!! 我總共買左兩件 Tee, bikini, 一堆人字拖，一件繡咗狗狗圖案嘅恤衫 (喱件最貴.... 要二百幾蚊港紙... 所以都掙扎咗好耐....), 仲買咗香薰~~ 行完翟道翟, 我地夠鐘去做 Spa 喇~~ Lala 喺香港嘅時間已經 book 咗 Coran Boutique Spa, 佢有接送服務, 我地要搭 BTS 去到 Eakkamai 站隔壁嘅 Thardthong Temple 等佢架車~~ 去到 Coran, 係一間感覺好高貴嘅店, 首先要填一份 form, 問下你關於身體一般狀況, 仲會俾你揀埋等陣用咩香薰油按摩~~ 點擊圖片放大 +2 之後就入房喇~~ 間房都算大, 有三張床, 仲有個大廁所加淋浴間再加浴缸~~ 沖乾淨身, 換好佢提供嘅紙底褲, 就可以上床開始喇~~ 成個過程大概 3 個鐘, 佢會幫你全身磨沙啦, 推油按摩啦, 仲有個全身嘅 mask~~ 每做一樣嘢之後都要入廁所沖身先做第二樣~~ 喱次係我咁大個人第一次做 Spa... mm... 可能我始終麻麻地要光脫脫咁俾陌生人摸來摸去啦... 我就覺得一般... 係好 relax 嘅... 但感覺掙 D.... 我零願普通揼返骨仲爽... hahaaa 點擊圖片放大 +5 叉完電我地就去唐人街食晚飯喇~~ 我地叫咗一人一碟生蝦, 一碟 8 隻都只係 HKD50~~ 超正呀!! 仲有大蝦、咖哩魷魚、煎蛋同炒通菜, 喺 Bangkok 最後一晚梗係要豐富 D 啦~~ heheeee, 食飽飽去附近林真香買咗少少嘢食, 之後就搭 ”篤篤” 返酒店喇~~ 點擊圖片放大 +9 返到酒店又係影戰利品嘅時間... hahahaa~~ 因為喱兩日香港打風, 我地都有 D 擔心返香港程機唔知會唔會有影響.... 喱個時候都唔諗得咁多... 一於為今次嘅旅程啤啤佢~~ 我地喺房入面嘅自製 wifi 偏廳飲住啤酒上網, 爽呀~~ hahaaa~~ 聽日仲有半, 玩埋先算!!! 點擊圖片放大
