契細佬結婚，做姐姐嘅，唔單止要出力幫手，仲借埋個女俾佢做花女，我待佢都不薄喇掛！（其實可能我開心啲） 為咗今次，我真係做咗唔少準備工夫架！首先講吓打扮先： 頭飾 $79 （購自葵涌廣場鋪頭仔） 白色裙 $210 （購自中環利源東街鋪頭仔） 白色鞋 $190 （購自NEXT DIRECT） [媽咪都真係為咗佢洗咗唔少錢．．．] 除咗打扮，要佢明白做花女嘅目的先係最重要，我同寶貝女講咗好多嘢： 結婚，係一個好認真、好重要嘅儀式，證明兩個人永遠喺埋一齊，一世人一次架咋！ 寶貝女進場嘅時候，係拎住戒指枕，連同一對結婚戒指，為免佢唔小心，媽咪拎個道具試吓，期間不斷提醒：「結婚戒指好重要嘅嘢黎架，哥哥姐姐相信COURTNEY可以保管到，先會叫你幫手拎架咋，你陣間都會好小心，係咪？」 伴娘姐姐指點寶貝女點行，寶貝女都好聽話！ 到正式嘅時候，LEE個小朋友真係好認真，淡淡定定冇失禮，身邊嘅叔叔姨姨哥哥姐姐都大讚！ 睇落去，邊似一個4歲半嘅小朋友呀，咁老積！ 儀式完咗，最開心有嘢食喇！（一食嘢就變番BB樣） 媽媽見到佢咁認真對待LEE件事，我超級安慰，超級感動，感動到又令眼淺嘅媽咪想喊喇．．．． 朋友話，寶貝女LEE個年紀做花女就最啱，唔怕太細個會出錯，又唔怕太大個唔夠得意。大家又點睇呢？
