上星期，我同屋企人一齊搞咗個poolside party，等啲小朋友可以叫埋同學仔，趁住國慶放假又可以一齊游吓水、燒吓嘢食咁，寶貝女最希望邀請嘅，當然係佢N班一齊玩到而家嘅好朋友逸逸啦！ 藍色泳帽嗰個就係逸逸喇! 逸逸係一個好乖巧嘅男仔，我同婆婆都超鐘意佢，又有禮貌，食飯又乖，今次邀請咗佢黎游水，仲要發現4歲半、102cm嘅佢已經唔駛用水袖或者浮板，1.2m水深嘅泳池都可以好自如咁落水就開始游。婆婆見到十分驚訝： 「嘩，你睇吓逸逸幾叻，已經識游水喇，駛唔駛幫寶貝女搵番個教練？」 「你睇吓逸逸食嘢幾乖，又食得多，怪不得啲手腳咁實淨！」 lee個時候，我只係諗到一句我曾經聽過嘅說話：「點解大家都想小朋友十全十美，又接受唔到佢哋有任何缺點呢？」 有時回想番自己教寶貝女，可能都放好多注意力喺佢嘅缺點嗰度，好似學校家長日咁，老師曾經講過，話寶貝女唔專心，怕影響佢第時學習嘅進度；聽完之後我超擔心，即刻向其他媽咪取吓經，問吓點樣改善好。大家都提供咗好多唔同嘅方法，但係令我最印象深刻嘅，唔係邊一種方法，而係：「其實你唔駛太擔心呀，我覺得courtney好多優點架喎，性格開朗啦、主動啦、講嘢叻啦等等，只要我哋放大黎睇，lee啲優點就會變大，可以好好發揮；同樣地，只要我哋睇得啲缺點細啲，啲缺點就自然會相對變細，會易啲改善架喇！其實courtney lee啲缺點未算嚴重，我諗你之前都知架喇，不如請老師多啲留意佢嘅優點，睇吓可以點發揮佢嘅潛能仲好啦！」 lee個媽咪講嘅嘢真係當頭棒喝，係喎，點解我一直都冇留意到，自己放喺「改善缺點」同「發展/發揮優點」嘅時間咁唔平均嘅呢？究竟係咩原因，令到我差啲忘記咗每個小朋友都係一個獨立個體呢？我諗，尊重小朋友嘅個人嘅特質，用適合佢嘅培育方法，避免「倒模」，係lee個生命工程入面又一項好重要嘅功課。 真心的，我真係好感激lee位媽咪朋友，佢lee句說話，令到我對寶貝女嘅缺點放得輕咗，但係唔代表唔重視，反而係更有耐性，慢慢改善，而且更加明白小朋友之間唔作比較，對小朋友好，對自己更好！
