媽媽們有過感動嘅一刻嗎？ 可能唔係一刻，係好多刻！ 做咗媽咪之後，淚點超低，咩事都可以谷到眼濕濕，有人話，係荷爾蒙嘅問題，亦有人話，係明白媽咪嘅辛酸，感同身受嘅問題。無論咩原因都好，辛辛苦苦照顧自己嘅小朋友，睇住佢成長，箇中嘅甜酸苦辣，真係做媽咪至知。 可能寶貝女係我第一個女，係我真真正正睇住佢成長嘅小朋友，睇住佢嘅轉變，冇一唔感動。 好深刻嘅一次感動係喺我埋身餵緊人奶嘅時候，當時寶貝女咬痛我，我即時鬧佢，希望佢知道咬我係唔啱啦，跟住佢喊喎！我超感動，超開心，佢對我話佢有反應呀！（我同親朋友講都話我低能．．．．．．） 感動嘅事，又點少得開學日呢！第一次著起校服個樣，媽咪愛死喇！ 熱淚盈眶嘅一次，不得不提上年觀課日，我哋同其他家長們一齊坐晒喺課室，睇住寶貝女搭住小朋友嘅膊頭，一邊行入課室，一邊唱：「大家來上學，快快學唱歌．．．」嘩！寫緊lee篇日誌嘅時候，諗起當時嘅畫面都想喊呀！（我都解釋唔到） 剛剛過去嘅母親節，嗰種感動令我攬住個女喊添呀！話說寶貝女番主日學，同小朋友一齊練習咗一首歌喺母親節當日送俾媽咪，睇住寶貝女上台唱歌做動作，我已經興奮不已，仲要加埋啲攞命嘅歌詞，搞到佢落台走埋黎送花俾我嗰刻，我lee個「傻婆一號」真係喊到收唔到聲呀： 願我的媽媽 別這麼辛勞 期望我長大 能待你好 做個乖寶寶 親恩我會報 期待錫晒你一直終老 琴晚嘅功課，係畫一幅圖畫，講吓快樂嘅學校生活，見佢一筆一畫咁畫咗個學校門口，又畫自己，又畫好朋友逸逸，我嗰啲感動嘅淚水又湧出黎喇！ 太多太多事值得感動，雖然全部都係簡單嘅事，但係媽媽們，你哋明白嘅！
