「寓學習於遊戲」相信係各位現代媽媽嘅宗旨，喺平版電腦盛行嘅年代，各品牌都爭先推出幼兒學習應用程式（APPS），色彩繽紛之餘，又學到嘢，坐車又玩得，媽咪做緊嘢又玩得，幾好！寶貝女一歲嘅時候，我都download過一個Elmo ABC俾寶貝女玩，但係之後都冇再download過lu，我都係buy傳統嘢多啲。又有得玩，又有得動腦筋嘅遊戲，非「大富翁」莫屬啦！ 雖然Monopoly Junior寫住係適合5歲以上，但係由於嗲哋媽咪太鐘意大富翁，寶貝女4歲未夠我哋已經買咗嚟玩喇！ 話明係Junior，梗係易玩好多啦！ - 成個board只得24格，只需要用一粒骰仔； - 棋子係小朋友最鐘意小貓、小狗、車仔同戰艦，玩都玩得開心啲； - 正常版賣嘅係城市/街道，junior版賣嘅係店鋪或者大廈，好似玩具店、博物館，當然有中文又有英文啦； - 每個顏色只得兩個shops，啲shop嘅價錢由1蚊至5蚊，所以紙幣都只有1蚊，小朋友好容易掌握； - 買咗之冇地契架，放一張屬於自己嘅圖案卡仔就ok； - 收租只係收番售價，買齊同色（即係兩間shops）就收雙倍租； - 機會卡嘅內容都貼緊小朋友一啲，好似「食得太多糖，要付2元」或者「完成所有功課，可得2元」等等； 寶貝女玩lee啲遊戲真係有啲運仔，好容易就買晒同色，成日要媽咪俾雙倍租，媽咪當然要佢動吓腦筋，話俾我知雙倍租即係幾多錢啦！媽咪曾經教過佢，4嘅雙倍即係4加4，所以佢對於雙倍嘅租都瞭如指掌，叻女！ 唔單止計數，機會卡又要自己讀啦（暫時淨係識睇英文咋），shop名要睇中文又要睇英文，個腦仔要不停咁轉，玩lee個遊戲都好忙架！ 但係由於佢真係好運到不得了，眨吓眼媽咪lee隻戰鑑已經輸咗！ 吓？乜媽咪唔係狗仔咩？ 唔係！只係佢lee雙貓仔買鋪頭，買到唔夠貓仔卡要用埋啲狗仔卡咋，媽咪今次真係輸到一敗塗地！ :cry:
