[1-9-2014] 9月唔單止係開學嘅大日子，仲要係我哋最愛嘅人生日，佢就係寶貝女嘅阿婆喇！ 寶貝女細個嘅時候由阿婆湊，一直到大概兩歲，而近lee兩年，阿婆至少都會一個禮拜嚟瞓一晚，同個孫相處一下之餘，又可以俾我久唔久約啲朋友食餐飯，所以阿婆真係好重要架！每年我同老公都會買生日禮物俾阿婆，但係我始終覺得，寶貝女都已經4歲，係時候要付出吓，一齊向阿婆表達我哋對佢嘅愛，所以，寶貝女能力範圍做到嘅，佢揀咗生日卡。 趁琴日落雨，我哋決定唔出街喺屋企開工！ 其實好多小朋友都鐘意做勞作，媽咪只需要買啲材料就ok。今次lee張handmade生日卡，我就買咗以下嘅材料： 白色卡紙 信封 彩色摺紙一叠 絲帶 少量閃石 花紋膠紙 雖然不嬲都冇乜藝術天份，但寶貝女做起勞作時都好專心，好投入，成日問媽咪：貼心心好唔好？我想貼lee度貼嗰度…… 勁多主意，梗係啦，張卡係送俾阿婆架喎，當然要俾心機啲。 整完信封同卡面，我哋要設計卡內頁喇！阿婆平時最擔心就係寶貝女歲幾都仲未識寫字，今次就等寶貝女寫俾婆婆睇，自己寫happy birthday同grandma啦！由媽咪串個字，寶貝女自己寫，雖然未識分大細楷，不過算係咁啦！哈哈！大功告成！ 點解要整兩張呢？ 哈哈，因為阿婆仲有個孖生家姐，寶貝女叫佢做二婆婆。二婆婆同我哋關係密切，就好似親阿婆咁，生日卡又點可以少咗佢嗰份呢？ 祝兩位婆婆生日快樂呀！
